Jowai : Kumba long lem ha baroh shityllup ka Ri India, ha Ri Lum Jaintia ruh mynta ka sngi la rakhe ia ka jingiohlaitluid ba 75 snem jong ka Ri India tang da ki katto katne ki briew sorkar bad ki nongiashimbynta da kaba bud ryntih ia ki kyndon jong ka koit ka khiah.
Ha Jowai la pynlong ia ka prokram ha madan Jrisalein bad ia ka lama lai rong jong ka Ri la pynher da u ma Sniawbhalang Dhar, Myntri jong ka Urban Affairs.
La ioh ruh ia ka jingrwai ieit Ri shaphang U Woh Kiang Nangbah da ka Ch’baeh Society for Literature Arts & Culture, Jowai ba la shim bynta da u Raymond Nartiang (President), Wansalan E Dhar (Founder Secretary) bad u Deiru Laloo (Member of the Society).
Namar ka jingdon jong ka khlam Covid-19 kumta la khang ia ki paidbah ban shim bynta hynrei la shu pyni live ha ka Yutip News (Facebook page).
Ha ka por mynstep ka la don ruh ka jingleit buh syntiew ha ka durmot jong u Woh Kiang Nangbah ha Memorial Park, Syntu Ksiar da u Deputy Commissioner ma Garod LSN Dykes bad u Superintendent of Police Shri. Bikram Marak.
Kum shi bynta ka jingrakhe jong ka jingdap 75 snem jong ka jinglaitluid ka Ri (Independence Day 2021 -Azadi Ka Amrit Mahotsav) ka ophis District Sports, West Jaintia Hills ka la pynlong ia ka Cyclothon, Independence Day Run bad ka Webinar naduh ka 13tarik haduh 15tarik u August, 2021. Ka jingthmu jong kine ki prokram ka long ban pynsngewthuh ia ka jingshahshitom jong ki nongialehlaitluid jong ka jylla.
Ha Amlarem la pynlong ia ka prokram ha Syiem Jingsuk Higher Secondary School, Lai Lyngdoh ha ka ba u Myntri jong ka tnat Fisheries ma Dasakhait Lamare u la pynher ia ka lama.
Ha Shangpung la pynlong ia ka prokram ha Hula Playground Moosyiem, ha ka ba u Local MLA ma Coming One Ymbom u la pynher ia ka lama.
Ha Khliehriat la pynlong ia ka prokram ha Khliehriat Higher Secondary School bad la wan pynher ia ka lama da u ma Kyrmen Shylla, Myntri jong ka tnat Social Welfare.
