Kum shi bynta na ka World Environment Day 2024 ki bor pynïaid District jong ka West Jaiñtia Hills ki la pynlong ïa ka jingïalang ha District Library Auditorium, Mynthong, Jowai ha kaba la wan ban ïashim bynta lang da u Deputy Commissioner bah B.S. Sohliya, IAS, u Addl. Deputy Commissioner & District Planning Officer u bah F.B. Basan, u Assistant Commissioners bah S. Phanbuh bad u bah W. K Kharbuli bad u Waheh Shnong Dorbar Shnong Chilliang Raij ma D H Pde.
La wan ban ïa don lang ruh ha kane ka prokram da u Pawan Ashok Khade IFS, ki khynnah skul bad ki nonghikai na ki skul bapher bapher na Jowai, kumjuh ki nongmihkhmat na ki tnad sorkar bapher bapher bad na ki dong ki shnong bapher.
Ha kane ka prokram la kiar na ka jingpyndonkam ïa ki plastic kum ka jingthmu jong ka phang pdeng kaba ong “Land Restoration and Beating Plastic”
U Deputy Commissioner bah B.S Sohliya ula kren halor ka phang ban pynbit pynbiang halor ki jaboh bad ka rukom ban pynmih jingmyntoi da kaba pynkylla dur ïa ki sha kiei kiei kiba thymmai.
Kawei na ki jingiashim bynta ka long ka jingïakop shondur halor ka phang “The Ugly Picture Contest. Kila don 120 ngut kiba la ïashim bynta ha kane ka ïakop kaba la ïaid shibnai lynter, hynrei la jied noh sa tang 23 tylli na ka bynta ban wan rah ha kane ka exhibition. Ki khynnah skul na ki 2 tylli ki skul kata ka HK Singh Memorial School bad ka North Liberty HSS kila pyni dur kumno ba kila pynlong ïa ka jingpynïakhlad ïa ki jaboh bad ruh ka jingpynkhuid pynpliah ïala ka jong ka phylaw skul.
La pynkut ïa ka prokram da ka jingsam ïa ki khusnam sha ki nongjop halor ki jingïakop bapher bapher kiba la pynlong ha ki taïew kaba la pynïaid da ka District Planning Officer, ka jingiakop ïalehkai Chess, ïalehkai Scrabble bad ka jingïakop shondur.
Ka skul North Liberty HSS ka la long ka lahduh ha ka Word Fest (Scrabble), ka Government Girls’ HS School kala wan ba-ar bad ka HK Singh Memorial Secondary School ka la wan ba-lai. Ha ka jingïakop Chess na ka liang ki kynthei ka Government Girls HSS kala jop baroh ki kyrdan. Ha ka liang ki shynrang ka Ches Star HSS kala wan ba nyngkong, ka QC Springside kala wan ba-ar bad ba-lai.
Ha ka ïakop shondur (Photography) ïa ka kyrdan ba nyngkong la ïoh da ka Tome Memorial School, ba-ar la ïoh da ka Jaiñtia Higher Secondary School bad ba-lai la ïoh da ka HK Singh Memorial School. Ka North Liberty HSS kala ïoh ïa ka khusnam ba kyrpang halor ka jingpynpoi lut ïa baroh ki dur jong ka jingïakop shondur.
Ïa kane ka sngi World Environment Day la rakhe ruh ha kiwei de ki bynta jong ka District. Ha Jowai kala don ka jingthungdieng ba la pyndep da ka Land Committee jong ka Seiñraij Jowai, kaba la thung dieng ha Loom Mookhai bad ha Biar Ka Blai.
Ha shnong shnong Mooshrot kaba hap ha Laskein C&RD Block, ruh la ïashim bynta da ki khynnah skul bad ki nonghikai jong ka Chankylliang Evergreen LP School, Mooshrot, ban rakhe ïa kane ka sngi World Environment Day bad kila thung ruh 16 tylli ki tynrai dieng ha phyllaw ka skul.
Ka ophis jong u Range Forest Officer Social Forestry Range Shangpung ruh kala rakhe ïa ka World Environment Day ha Sawlyngdoh Higher Secondary School, Mookaaiw halor ka phang pdeng “Land Restoration, desertification and drought resilience”.
Ka ophis jong u Superintendent of Police, WJHD lyngba ki ophisar kila rakhe ïa ka World Environment Day halor ka thong kaba ong “Ek Ped Maa Ka Naa’ ha kaba ki ophisar bad nongtrei ka ophis kila thung dieng ha phyllaw jong ka Jowai Police station ryngkat ka jingthum ban ïaleh pyrshah ïa ka ‘Global warming’.
