Ia ka ‘World Milk Day’ la rakhe hynnin ka sngi (1.6.22) ha Jowai lyngba ka tnad Animal Husbandry & Veterinary Department Directorate Dairy Development jong ka sorkar jylla, ha ka jingialang ba la pynlong ha Conference Hall da ka ophis u Senior Dairy Officer ka West Jaiñtia Hills District kaba don ha Mynthong, Jowai.
La rakhe ia kane ka sngi kum shibynta ban pynsngewthuh halor ka jingdonkam ban dih ia ka dud man la ka sngi namar ba ka dud ka dei ka jingbam kaba biang nadong shadong bad kaba iarap ban tei ia ka met ka phad, da kaba pynsngew ba ym don satia kiwei pat ki jait jingbam kiba long kum ka dud kiba don lut ia baroh ki ‘Nutrients’.
Ia ka jingialang ha kane ka sngi la pyniaid da u Senior Dairy Officer West Jaiñtia Hills District Jowai ma B. Dkhar, ha ka jingdonlong u kongsan bah W.K. Kharbuli (MCS) Extra Assistant Commissioner ka WJH, u Dr. G. L Niang Sub-Divisional A.H & Veterinary Officer Amlarem WJH, ka Dr. E. Passah Senior A.H & Veterinary Officer Poultry Farm, Jowai, ka kong M. Shylla Dairy Officer (Quality Control) RDEC Jowai Diary Plant, Dr. I.D. Slong, Senior A.H. & Veterinary Officer, Pig Farm, Khliehtyrshi, ki nongrep kiba dei ki nongri jingri, ki khynnah skul bad kiwei de.
U Dr. G. L. Niang Dub-Divisional A.H & Veterinary Officer Amlarem haba ai jingkren ula ong ka jingrakhe ia ka ‘World Milk Day’, kalong ban pynkymmaw burom kumjuh ia u Dr. Verghese Kurien bam kwai ha dwar u Blei uba long uwei na ki nongshong shnong ka Ri India uba la trei shitom met bad mynsiem ban wanrah ia ka burom ia ka Ri da kaba lah ban pynmih buh eh ka dud hapoh ka Ri.
Ula pynsngew ba ha u snem 1950 lyngba u Verghese Kurien la lah ban pynmih ia ka dud haduh 17 million ton hapoh ka Ri, hynrei utei u rangbah um shem la shong kli kti, hynrei ula seng ia ki Co-operative Society bad kiwei de ki sengtreimon sngewbha bapher bapher bad ha u snem 1970 ka ri India ka la ioh syndon ia ka nam (Record) kaba lah ban pynmih bun tam ka dud haduh 140 million ton ha ka pyrthei hi baroh kawei bad kane ka long ka burom ba khraw ia ka Ri India.
Shuh shuh ula batai khyndiat ba ha ki por mynshwa la shna ruh ia ka dud da kaba tylliat bha da u khaw, u toh bad u snepkor hynrei ynda la wad bniah bha la lap ba kam long satia kaba bha haduh katta kata kumba long ka dud kaba ioh na ka kmie i khunlung bad na ki jingri ba pynmih dud kiba don ia ka Vitamin-D.
Kumta ula kyntu ia ki nongri dud hapoh ka District ba kin shim ia kane ka kam da kaba pynjanai shuh shuh ia ka bad khamtam ban ai jingtip lem sha ki khun ki kti khnang ba ka pateng jong ki ban pynmih dud kan neh sah lashai la shisngi.
Ka kong Dr. E. Passah Senior A.H & Veterinary Officer Poultry Farm, Jowai kala iathuh ba ia kane ka sngi la lamkhmat da ka Food and Agriculture Organisation (FAO) jong ka United Nations ia kaba la rakhe ha kylleng ka pyrthei, kaba batai ia ka phang halor ka rukom iaid lynti ha ka kam ri jingri naka bynta ka jingbha jingmiat jong ka mariang bad ka koit ka khiah bad ka lad ban pynkiew ia ka ioh ka kot.
Kala ong ba ka dud ka long kaba donkam bha haka met u briew namar ka pynskhem ia i shyieng, ka Vitamin kaba don ha ka dud ka iarap ban pynkhlaiñ ia ka bor met (immune system), ha ka juh ka por ka dud ka lah ban pynbhabriew bad pynioh thiah bha ha ka por miet. Kumta ka kyntu ia ki khynnah skul ba dei ban dih ia ka dud manla ka sngi, kala ai mynsiem ruh ia ki nongri jingri ba ki dei ban sngew sarong iala ka kam ba ki trei.
Katba na ka liang u kongsan bah W.K Kharbuli ula batai kyndiat shaphang ka phang jong kane ka sngi bad ula ai mynsiem ia ki nongri masi ba ki dei ban don ka jingiatreikam lang bad ka tnad Animal Husbandry & Veterinary Department jong sorkar namar ka long kaba donkam eh ban don ka ka jngiasngewthuh jingmut na ka bynta ban pynkiew ia ka ioh ka kot ha baroh ki liang.
Lyngba ka jingtreikam lang jong baroh u kyrmen skhem ba kan long ka jingiohnong kaba khraw ia ka District bad ka Ri hi baroh kawei bad ha kaba pynkut ia ka jingkren u buh ka jingkyntu ia ki nongri jingri ba kin wad ki lad ki lynti ban pynneh pynsah ia ka kam pynmih dud pateng la pateng.
Ia ki kyntien ai khublei la ioh na u bah E.C Pyngrope Dairy Officer (Extension) West Jaiñtia Hills District Jowai. Ha kane ka sngi kum ka dak ban pynshlur ban dih ia ka dud, na ka liang u kongsan ula sam ruh ia ka dud sha ki khynnah skul kiba la poi sha kane ka prokram.
