Ka District Tuberculosis Control Society, West Jaiñtia Hills mynta ka sngi ka la rakhe ïa ka ‘World Tuberculosis Day’ ïa kaba la ju rakhe manla ka snem ha kylleng shityllup ka pyrthei bad ka phang mynta ka snem ka long “Invest to end Tuberculosis, save lives”.
Ïa kane ka jingpang na ka liang ka sorkar kala don ïa ka thong ban pynduh jait noh shi syndon ïa kane ka jait jingpang (TB) hapoh u snem 2025.
Ha Jowai la rakhe da kaba pynlong ïa ka jingïaid rally ha ka por mynstep da ki motor bike bad ki kali ryngkat ki jingthoh ha ki placard, kaba la sdang na Mihmyntdu bad ïaid kylleng ka sor Jowai da kaba pynkut ha District Tuberculosis Center Panaliar, Jowai. Kane ka long ruh shi bynta na ka National Tuberculosis Elimination Programme jong ka sorkar.
La ïathuh ruh ba ka jingrakhe ïa kane ka sngi ha manla ka snem kan ïarap ïa ki mynsiem briew ban lait na kane ka jait jingpang TB da kaba pynlong ïa ki prokram ai jinghikai bapher bapher sha kylleng ki shnong jong ka District, khang ba kino kino ki briew kiba don ïa ki dak ki shim jong kane ka jingpang ki lah ban wan mih shakhmat na ka bynta ban ïoh ka jingsumar kaba biang.
Shuh shuh la ong ruh ba na ka liang jong ka sorkar ruh ka la ïaleh katba lah ban pynsngewthuh ïa ki paidbah ba ïa kane ka jingpang lah ban pynkoit ïa ka da kaba dih tista ïa ki dawai dashin. Ha ka juh ka por ki bor District ryngkat bad katei ka tnad (TB) ki la ïoh lad ruh ban ai jingtip sha ki paidbah lyngba ki Video ha ki Social media.
Ha kane ka sngi la donlang da ka ka Dr. I. Khyriem, Sr. Medical & Health Officer, DTC Jowai, ki nongtrei District Tuberculosis bad kiwei de.
