Ka Alliance For Sustainable Green and Clean Nature (ASGON) Eastern West khasi Hills District ha ryngkat ka jingiatreilang bad ka Meghalaya State Pollution Control Board (MPSCB) Forest And Environment Department jong ka sorkar Jylla hynnin ka 4 tarik u Naitung 2025 ka la pynlong ia ka Prokram Award And Awareness halor ka phang “Ending Plastic Pollution Globally” ha ka shnong Kynshi Bangla.
Kane ka prokram ka long shi bynta jong ka jingrakhe World Environment day ban pynsgewthuh paidbah halor ka jingdonkam ban pynduh noh ia ka jingpyndonkam ia ki plastic kiba ktah ia ka koit ka khiah ia ki nongshong shnong ka Mariang bad kumjuh ruh ban hikai halor ka jingsumar ia ka Mariang kum ia ki khlaw ki btap bad ban iada ruh ia ka wah Kynshi.
Ha kane ka sngi la sakhi ia ka jingiadonlang u MDC ka Pariong Mawthadraishan Constituency u bah Powell Sohkhlet kum u Kongsan lem bad u Ophisar ka MPSCB u bah S. Syiem, u Chairman ka ASGON u bah T.S Shangrit ,u Sordar ka shnong Kynshi Bangla u bah S. Warjri kiwei de ki nongkitkam shnong ha ryngkat ka jingsakhi lang ki longkmie ki rangbah na kane ka shnong.
Haba kren kum u Kongsan u bah Powell Sohkhlet u la ong ba kum ki nongshongshnong ki donkam ban iatreilang ban iakhun ban pynduh ia ka jingpyndonkam ia ki plastic kiba buh jingma ia ka koit ka khiah bad ia ka Mariang. U la kyntu ba kidei ban bud ia ka aiñ ba la pyntreikam da ka sorkar bad ruh kum ka sorkar ka dei ban long kaba kit khlieh ban talasi ia ki ba pynmih beaiñ ia ki plastic.
Ula iathuh ruh ba ka District Council lyngba ka Solid Management Cell kan ai ia ka skhim sha ki Shnong ban wanrah ia ka jingkhuid hapoh ka shong ka thaw.
