Ka ophis jong u Lat ka Jylla kaba don ha Raj Bhavan, Shillong ruh mynta ka sngi kala pynlong ia ka jingrakhe ia ka lyngkhuh sngi dap ba 78 jong ka jingioh laitluid ka ri India, ne ka 78th Independence Day Celebration 2024 bad ia kane ka jinglehkmen la pynlong ha phyllaw jong ka Raj Bhavan, Shillong, ha kaba u Lat ka Jylla u C.H. Vijayashankar ula shim ia ka bynta ba kongsan jong ka prokram.
Ha kane ka jingrakhe kila don shibun jait ki jingialehkmen lyngba ki jingrwai ieit ri, ki shad tynrai nalor kiwei de ba la iashim bynta da ki jait bynriew bapher bapher. La wan ruh ban iadon lang da u Myntri Rangbah ka jylla u Conrad K Sangma, lem bad kiwei de ki heh sorkar.
