Ki bor pynïaid jong ka skul Albin Lamare Memorial Secondary School, Nangbah ha ryngkat ka kur Lamare bad kiba haïing ha sem jong u (L) Albin Lamare mynta ka sngi 27 tatik u Jymmang kila rakhe kynmaw burom ïa ka sngi ïap ba 43 snem jong u, da kaba leit buh syntiew bad thang mombati ha trai u mot sahnam uba don ha phyllaw jong katei hi ka skul.
Ïa ka jingïalang ha kane ka sngi la pynïaid da u ma T. Iongwai la ïoh ruh ka jingkren pdiang sngewbha da ka Headmaster jong ka skul ka kong M. Hinge, kumjuh ka jingkren lyngkot na ka Kur Laskor, Kur Lamare bad na u MDC ka thaiñ u Gresentus Susngi kiba la pynpaw ka jingïaroh kaba khraw eh ïa utei u riew rangbah uba la lah ban pynwandur ïaka pule ka puthi ha shnong Nangbah da kaba seng ïa kane ka skul ban ai jinghikai ïa ki khynnah pule jong ka thaiñ.
U Dr. H. Lamin haka jingkren ula pule ïa ka poitri kaba ïadei bad u (L) Albin Lamare shuh shuh ula ong nalor bad ula long u nongmihkhmat (Politician), u nonghikai skul hynrei ula ïoh lad ban leit sam ruh ïa ka khubor na ka ktien U Blei ha kylleng ki jaka bad khamtam ha ka shnong Nangbah. Ha ka juh ka por u Dr. Lamin u kitbok kitrwiang ïa ki khynnah pule jong kane ka skul ba kin long kiba trei shitom na ka bynta ka lawei kaba phyrnai.
Naka liang u ma M.M. Thaiang ula pynsngew khyndiat shaphang ka jingim jong u (L) Albin Lamare, la kha ïa u ha u snem 1936 ula long ruh u nonghikai skul bapaw bha jong katei ka thaiñ bad u long u briew uba don ka mynsiem ban kyntiew kynrong ïaka Ri bad ka jaitbynriew naduh ka stad ka tip, ka kamai kajih bad ka roi ka por. Hapdeng ki jingeh babun ha ki jingpule puthi kiba ula pyndep, ula ïoh ïaka kam sorkar kum u LD bad hadien kane ula shim noh da ka kam nonghikai ban sam jingtip sha ki khynnah skul da kaba leit hikai skul ha Marian Hills ha Jowai.
Kum ka dak ban kynmaw burom ïa u (L) Albin Lamare ha kane ka sngi la pynlong ruh ïa ka jingsngap jar ba shipor ba la shim bynta lang da ki khynnah skul, ki nonghikai bad baroh kiba la wan sha kane ka jingïalang.
