Ia ka Republic kaba 76 mynta ka sngi la rakhe ha madan ialehkai Jrisalein, Chutwakhu, Jowai ha kaba u ma Comingone Ymbon u la wan ban pynher ia ka lama lai rong jong ka ri bad shim ruh ia ka Rashtriya Salute jong ki 15 tylli ki kynhun ba kynthup ia ki District Police Jowai, ki NCC na ka Govt. Girls HSS, ka Meghalaya Bharat Scout and Guides bad bad 12 tylli ki skul bud sa ka jingpyni Tableau da ki Department bapher bapher kiba pyni ia ki skhim bad jingjop jong ki.
Ia ka nam Best Marchpass la ioh rah da ka skul JNV Mukhla, ia ka nam ba-ar la ioh da ka Seinraij Higher Secondary School, Jowai bad ia ka nam ba-lai la ioh da ka St. Mary Mazzerello HSS, Jowai.
Ka ophis District Horticulture Officer, Jowai ka la rah ïa ka nam ba nyngkong ha ka jingpyni ïa ki tableau, katba ka District A. H & Veterinary Officer ka la rah ïa ka kyrdan ba ar bad ka District Commerce & Industries Centre ka la rah ïa ka nam ba lai.
Ha kane ka sngi ka District ka la sam ruh ïa ki Mementos sha ki nongrwai ba kynthup ïa ki nongthaw jingrwai, ki nongrwai, ki nongnoh synñiang sha ka music video ha ka jingiadei bad ka theme song jong ka 6th Meghalaya Games.
Kiwei pat ki jinglehkmen jong kane ka sngi ki long ki jingrwai, ki jingshad bad ka jingsam ia ki jingai sngewbha bad ki jingbam sha ka Children’s Home da ki heh sorkar bad ki kynhun seng (Social Organisation).
La rakhe ruh ïa kane ka sngi ha Amlarem Civil Sub Division bad ha Hima Shangpung ha kaba u Shri. Gavin Mylliem, MLA ka Sohra u la pynher ïa ka lama ka Ri ha madan ïalehkai Amlarem Government Lower Primary School, Amlarem bad ka Smt. Santa Mary Shylla MLA ka Sutnga Saipung ha Madan ialehkai Hula, Shangpung Moosyiem.
Nalor ka jingai khusnam sha ki parade ba tbit tam ha Amlarem Subdivision, ka ophis ka la pynkup burom ruh ia arngut ki nonghikai ka Smt. Amvalina Buam na ka skul LP sorkar Muktapur bad u Shri. Tiliyous Lamare jong ka skul sorkar Tarangblang na ka bynta ka jingaiti lut bad ka jingtrei shitom jong ki. La sam ia ka Award sha u Shri. Dawani Challam, Assistant Agriculture Inspector, Amlarem na ka bynta ka jingtrei ba long ka nuksa jong u.
La pynkup burom ia ka Water Committee jong ka shnong Dawki na ka bynta ban pynthikna ia ka um dih kaba khuid bad kaba bit ba biang na ka bynta baroh ki longiing. La ai ia ka syrnot ai khublei sha baroh ki skul kiba la iashim bynta. Ki ASHA ruh ki la shah pynkup burom lang ha kane ka sngi ba rakhe ia ka Republic Day.
