Kum ka jingiashim bynta bad ka prokram jong ka sorkar kmie ka Ek Bharat Shreshtha Bharat, da ka jingthmu ban wanrah ia ka jingiadei bad ka jingiasngewthuh jingmut hapdeng ki para nongshnong shnong ha ki jylla bad ki Union Territories bapher bapher, hynnin ka sngi (2/12/2023) la pynlong ia ka prokram ‘Cultural Evening’ ha Raj Bhavan Shillong kaba long ruh shi bynta na ka jinglehkmen ia ka jingioh jylla bapura ka jylla Assam bad ka Nagaland.
I Dr. M Ampareen Lyngdoh iba dei i Helath Minister ila long i kongsan ha kane ka prokram ha ka jingiadon ryngkat u Dr. Lajja Ram Bishnoi uba dei u Director General of Police, ka jylla, u Commissioner and Secretary to the Governor, u Dr B D R Tiwari, IAS and kiwei de ki shah khot sngewbha.
Haba ai jingkren ha kane ka prokram i kong Lyngdoh ila pynpaw ka jingkmen ban ioh iadon bynta lang ha kane ka jinglehkmen. Kala pynpaw ba ka long kaba donkam bha ban ia pyni markylliang iala ki jong ki jong ki riti dustur hapdeng ki nongshong shnong bapher bapher ban pyni ia ka jinglong riewspah jong ka ri India halor kine ki dustur bapher bapher.
Kala iaroh ia ka jinglah jong ka Assam bad ka Nagaland ban noh synniang sha ka Ri halor ka jingpynbha pynmiat ia ki riti dustur. Kala ong ruh ba ka prokram Ek Bharat Shreshtha Bharat ka dei ka prokram bala shimkhia da ka sorkar India ka long kaba donkam bha namar ka iarap ban pynpaw ia ka jinglong kyrpang bad ka jingiohpateng ha ki ktien ki thylliehm ki niam ki rukom bad ki riti dustur bad kolshor bapher jong ki nongshong shnong ka ri India.
La ioh ruh ia ka jingkren na u Dr. B. D. R. Tiwari, uba la pule ruh ia ka khubor bala phah da u Lat ka jylla ha kaba iadei bad kane ka sngi.
Ia kane ka prokram la pynsngewtynnad shuh shuh da ka jingiashim bynta jong ki nong Assam bad nong Nagaland.
Ka la don ruh ka jingpyni ia ka jingkren (Massage) na u Lat jong ka jylla Assam u Gulab Chand Kataria lyngba ka video.
Ia kane ka prokram la pynbit pynbiang da ka Indian Council for Cultural Relations (ICCR) Shillong ha ka jingiatrei ryngkat bad ka Department of Arts and Culture, Government of Meghalaya.
