Ki bor pyniaid District jong ka West Jaintia Hills District lyngba ka ophis u Deputy Commissioner kala ioh ban sam ia ki khusnam sha ki skul kiba la jop ha ka jingiakhun ia kaba la tip kum ka ‘District Level Olympaid’ ha ka sngi ba rakhe ia ka jinglehkmen Independence Day ha nongbah Jowai hynnin ka sngi 15/8/2025.
Ia kane ka jingiakhun la pynlong ha ka 8 tarik mynta u bnai ha Government Boys’ Higher Secondary School, Jowai. La wan ban iashim bynta ha kane ka jingiakhun da ki 16 tylli ki skul kiba don ha ka Secondary Level na kylleng ki bynta jong ka District West Jaintia.
Napdeng kine ka North Liberty Higher Secondary School, Jowai kala wan ha ka kyrdan kaba nyngkong bad ioh khusnam da ka ‘Interactive Panel’, ka Q.C. Springside Higher Secondary School, Jowai kala wan ba-ar bad ioh ia ka khusnam da ka ‘Computer set’, katba ka Jowai Public School, Jowai kala wan ha ka kyrdan kaba lai bad kala ioh da ka ‘Meeting Room Projector’.
Nalor ki jingioh khusnam kane ka jingiakhun ka pynioh ruh ia ki samla pule ban pyni ia ka sap ka phong kaba ki don, ka jingkwah ban tip shuh shuh ha ka pule ka puthi bad ban kyntiew ia ka jingiatreilang hapdeng ki samla jong ka District.
