Shi bynta ban kyntiew ïa ka jingpyndonkam ïa ka teknoloji ha ki kam pule puthi jong ki samla pule, la sam ïa ki tiar pule digital ha ka dur jong ki tablet (M-TABs) hapoh ka skhim pule digital jong u Myntri Rangbah ka Jylla sha ki samla pule Higher Secondary jong ka East Jaiñtia Hills District ha ka prokram kaba la pynlong ha Khliehriat West Community Hall, Khliehriat mynta ka sngi 15-05-2025.
Ia kane ka prokram la pynlong da ki bor pynïaid District, East Jaiñtia Hills District ryngkat ka jingïatreilang bad ka tnat pule puthi jong ka Sorkar Jylla. La ïadon lang da u Myntri ka sorkar bad MLA ka Khliehriat u ma Kyrmen Shylla kum u Kongsan ha ryngkat ka jingïadon lang u Deputy Commissioner, East Jaiñtia Hills u Shivansh Awasthi, i Addl. Deputy Commissioner, kong J.U Kharpuri, Assistant Commissioner i kong F. Wann, i DSEO kong A. Syiem, ki nonghikai bad ki khynnah skul.
Haba kren ha kane ka prokram, u ma Kyrmen Shylla u la pynpaw ha kane ka jingïalang ïa ki sienjam ba la shim da ka sorkar na ka por sha ka por na ka bynta ka jingbha jingmiat jong ki nongshong shnong ha kylleng ka jylla ha ki bynta bapher bapher kynthup ïa ka pule puthi, ka koit ka khiah, bad kiwei kiwei bad u la pynshlur ïa ki samla pule ban don ïa ki jingpyrkhat kiba bha ha ka jingmut jingpyrkhat jong ki. U la pynpaw biang ba ka jingtrei shitom bad ka jingaiti lut ka long u shabi jong ka jingjop.
U ma Shylla u la ban jur ruh halor ka bynta kaba kongsan kaba ki kmie ki kpa ki don ha kaba thaw dur ïa ka lawei jong ki khynnah katba u la pynshlur ruh ïa ki samla pule ban pyndonkam hok ïa ki lad ki lynti khnang ban kin lah ban leh bha ha ka pule puthi bad ha ki kam ki jam jong ki ha ka lawei jong ki.
La ioh ruh ka jingkren na u Deputy Commissioner ka District u Shivansh Awasthi.
Kham hashwa, ha ka prokram kaba kum kane kaba la long ha kane ka juh ka jaka, ha kaba ka MLA ka Sutnga-Saipung ka kong Santa Mary Shylla ka la sam ïa ki tablet sha ki khynnah skul ha ka jingïadon lang u Deputy Commissioner, East Jaiñtia Hills District, u Shri Shivansh Awasthi, u Additional Deputy Commissioner, u Gautam Warjri, kiwei kiwei ki heh sorkar, ki khynnah skul bad ki nonghikai.
Ha ka jingkren ka kong Santa Mary Shylla kala ïathuh ïa ka jingïakynduh shimet jong ka na ka jingïalang jong ka Artificial Intelligence (AI) ha Belgium ka la pynksan ïa ka jingdonkam jong ka jingpule digital da kaba pynpaw ïa ka bynta kaba nangroi jong ka teknoloji ha ka liang ka pule puthi, ka la ai jingmut ïa ki samla pule ban pyndonkam ïa ka teknoloji da ka jingkitkhlieh na ka bynta ka jingkiew jong ki ha ka pule puthi bad ka lawei jong ki.
Ka kong Santa ka la pynpaw ruh ïa ka jingkyrmen ba ki lad jingïarap digital kiba la pynbiang kin pynsuk ïa ki samla pule ban ïoh ïa ki jingtip kiba donkam na ka bynta ka jingpule jong ki katba ka shim ruh ïa ka kabu ban pynpaw biang ïa ka bynta kaba kongsan ba la leh da ki samla pule ha kaba thaw dur ïa ka lawei jong ka jylla bad pynshlur ïa ki ban bteng ban trei shitom ha la ki jong ki jong ki jong ki jingpule ban ïoh ïa ka kyrdan bad ka nam.
Ki don baroh 800 ngut ki khynnah skul na ki 13 tylli ki Higher Secondary School kiba hap hapoh ka East Jaiñtia Hills District kiba la ïoh pdiang ïa ki tablet kiba long shi bynta jong ka jingpyrshang jong ka sorkar ban pynkupbor ïa ki khynnah skul da ki tiar digital na ka bynta ki jingdonkam ha ka pule puthi jong ki man la ka sngi. Ia kine ki tablet la pynbiang lypa da ki jinghikai kiba la pynbeit katkum ki jingdonkam jong ki khynnah skul Higher Secondary ha ka Arts, Science bad Commerce.
