Ka seng ki nongdie dohmasi jong ka West Jaintia Hills District, haka jingialang kaba long ha madan jong ka iew die ia ki masi kaba don hajan jong ka jingkieng Pamblah, harud jong u surok bah Jowai-Shillong, ki la rai ban pynlong biang ia kane ka iew kaba la rim kumba juh long ha ki por kiba mynshwa, kumba long mynta kane ka iew die masi ot doh ka la treikam la kumba ar taiew ei ei.
U President ka seng u ma L. Dkhar u la ong ba kane ka iew ka dei kaba ju long tang shi sien shitaiew kata tang ha ka sngi Musiang, u la ong kumba long mynta kane ka iew ka la sdang ban treikam biang kumta u kyntu ia baroh ki nongdie bad nongthied ba kane ka iew kan treikam biang kum bajuh long, u la ong ba kane ka iew ka sangeh shipor kata naduh u snem 2020 ter ter haduh mynta ka dei na ka daw jong ka jingdon ka khlam Covid-19.
U Secretary u ma Yoolang Ryngkhlem, u la ong kumba long mynta la iohi ia ki nongdie bad nongthied ki la sdang ban wan sha kane ka iew, kumta u kyntu ia kiwei de ba kin wan sha kane ka iew die masi ot doh kumba ju long ha ki por mynshwa.