Ka Dorbar Shnong Pdengshakap ka la ioh ban sdang biang ia ka lympung ialehkai Football kaba la ai kyrteng ka 10th Secondary School Football Knock-Out Tournament kaba la ju pynlong man la u snem bad ia kane ka lympung la sdang ha kane ka 30 tarik u Nohprah 2023 ha madan Pdengshakap.
Ia kane ka lympung la wan ban plie pyrda da u ma W. Chyrmang kum u Kongsan, ha ka jingiadon ryngkat ki rangbah kane ka thaiñ, ki dkhot jong ka Football Committee, ki paid nongshong shnong kum juh kiba shah khot sngewbha ban sakhi lang ia kane ka tournament.
U kongsan haba ai jingkren ha kane ka sngi ula iaroh bad kitbok kitrwiang ia ki nongpyniaid jong kane ka lympung khnang ba kan long kaba iaid beit iaid ryntih bad kan long kaba jop.
Ia ka jingialehkai sdang la iakhun hapdeng ka Siangkhnai FC pyrshah ia ka Nangbah Mulang SC, ha kaba ka Nangbah Mulang SC kala jop da 3-0 kol. Ia kine ki kol la ioh ban thep da u Elizer Suiam ha ka minit kaba 45 bad 70 bad u Dashngain Sukhlain ha ka minit kaba 48.
