Ia ka Integrated Health Camp la plie paidbah ia ka ha kane sngi thohdieng ha West Jaintia Hills District halor ka thong ban ai ka jingsumar kaba paka ka ba ar bnai ha baroh kawei ka District, da ka thong ban pynlong 17 tylli ki static camp ryngkat ki jingshakri kiba kynthup ia ki 150 haduh 200 tylli ki shnong jong ka District. Kane ka programe ka dei ka jingïatreilang hapdeng u District Medical & Health Officer, Jowai, ka ophis jong ka West Jaiñtia Hills Deputy Commissioner, ka Meghalaya Aids Control Society, Shillong bad kiwei kiwei ki tnad ka koit ka khiah. Ia ka jingialang la pynlong ha Ladthadlaboh Community Hall.
Ha ki ar bnai ki nongïoh jingïarap kin ïoh ïa ki jingshakri kiba bun jait kiba kynthup ïa ka jingpeit bniah ïa ka koit ka khiah, ka jingtest bad jingsumar ïa ka jingpang sniehdoh (TB), HIV, ka jingtest ïa ka jingpang Hepatitis B bad C ryngkat bad ki jingsumar de, ka jingpynrung kyrteng ïa ka MHIS bad kumjuh ruh ka jingleit jngoh ïa ki ïing jong ki briew
U ma A. Lipon President ka Synjuk Ki Waheh Shnong Ri Jaiñtia u la long u kongsan ha kane ka sngi ha ka jingdonlang u Waheh Chnong Ladthadlaboh u A. Shullai, bad kiwei ki riew rangbah na ka tnat ka koit ka khiah.
U ma Lipon haba kren u la pynpaw ia ka jingsngewnguh ia ka tnat ka koit ka khiah, u la ong ba ka koit ka khiah ka long kaba kongsan bha na ka bynta baroh bad pynpaw ruh ba kane ka programe ka long kaba donkam. U la ai ka jingïaroh ïa ka jingpyrshang jong ki nongtrei ka koit ka khiah bad ki nongtrei mon sngewbha bad pynshlur ïa ki paidbah ban ïashim bynta shitrhem bad ruh ban shim kabu ïa ki lad jingsumar ba la wanrah ha jingkhang jong ki da ka tnad ka koit ka khiah.
Ka Dr. B. Decruse, Project Director, MACS, ka la batai ia ka jong kane ka Health Camp kaba khlem jingsiew. Ka la kdew kyrpang ba ka HIV ka dang long ka jingpang kaba eh kaba dang donkam ban pynbun ïa ka jingpyn sngewthuh paidbah bad ban ai ki lad jingïada. Ha kane ka sngi la ioh ruhki jingkren da ka kong R. Passah District Social Welfare Officer katba ia kane ka prokram la pyniaid da u Dr. M. Syngkon, District Surveillance Officer, Jowai.