Ka jingai dawai Polio ïa ki hep rit kiba hapoh ka rta ba san snem ne ka ‘Intensified Pulse Polio campaign’ la sdang mynta ka sngi hapoh ka District West Jaiñtia Hills, ha kaba u Assistant Commissioner bah S. Phanbuh ula wan ban plie ïa kane ka prokram ha MCH Hospital Panaliar, Jowai da ka shim bynta ban pynjaw dawai ïa ki khunlung.
Na ka liang u bah Phanbuh ha ka jingkren uba kyntu ïa ki kmie ki kpa ba kin shimkhia ban ïalam ïa ki khun sha ki booth centres ban ïoh ïa kane ka dawai Polio kaba long ka lad jingïada ïa ka koit ka khiah jong ki khynnah.
Ka Dr. Helen J Uriah, District Maternal and Child Health Officer kala pynsngew shaphang ka jingdonkam ban ai ïa kane ka dawai sha ki khynnah rit khnang ba kin lait na ka jingpang kaba ktah na ka jingduna ha ki dkhot met.
Shuh shuh ka Dr. Helen kala ong ïa kane ka jingai dawai la leh ha baroh ki Polio booths centres kiba la buh ha ki dong bapher bapher hapoh ka sor Jowai, kumjuh ha ki Health centres bad ha ki shnong nongkyndong.
Kane ka jingai dawai Polio kala sdang naduh mynta ka sngi 4 tarik ban yn pyndep ha baroh kawei ka ka District ka ban bteng haduh ka 6 tarik u Lber, 2024 ka jingleit mih sha ki ïing kan long haka 5 bad 6 tarik u Lber, 2024.
Nalor ka District Medical & Health Officer Dr. Evalyneda B.V Laloo, ki Doctor bad ki Nurse jong ka MCH Panaliar, Jowai kila wan ban ïadon lang ha kane ka sngi.
Ki la don ruh ki kynhun napoh ka Health Department kiba la leit sha ki skul bapher bapher hapoh ka nongbah Jowai bad sha kiwei de ki shnong ban pynjaw dawai Polio ia ki khynnah skul.
