Mynta ka sngi 9 tarik Nohprah 2025 la sdang ïa ka jingpynsaphriang khubor halor ka jingïaryngkat kyrdan shynrang ne kynthei ïa kaba la tip kum ka “National Campaign for Gender Equality” ha ka District Level ha West Jaintia Hills District, Jowai halor ka phang: “Women Leading the Way; Economic Empowerment for Inclusive Growth Towards a Viksit”, ïa kaba la pynlong da ka District Mission Management Unit, WJHD, kaba pynleit jingmut ban kyntiew ïa ka ioh ka kot jong ki kynthei hapoh ka Nayi Chetna 4.0. Ka kong B. Blah kaba dei ka Project Director ka DRDA & Nodal Officer, DMMU, Jowai ka la long ka kongsan ha kane ka sngi ha ka jingïalang ba la pynlong ha District Library, Jowai.
Haba ai jingkren ha kane ka sngi, ka kong B. Blah ka la ai khublei ïa ka jingïatreilang kaba la ai da ka tnad Social Welfare, District Legal Service bad ki nongpynïaid. Ka la ai khublei ruh ïa u Headman ka Shnong Iooksi uba la ai ka jingkyrshan ïa kane ka campaign ha ka Local Level.
Haba pynpaw ïa ka jingdonkam jong ka jingiaryngkat shynrang bad kynthei, ka kong Blah ka la kdew ba watla ka kheinkur kheinjait ka long ha ki kynthei, hynrei bun ki kynthei ki dang ïakynduh ïa ki jingeh kum ka jingshah lehbeiñ ha ïing ha sem bad ka jingduna ki lad ban shim rai. Ka la ban jur ba kane ka jingïakhih, kaba la pynlong ha kylleng ka ri, ka thmu ban pynroi ïa ka jingsngewthuh, jingsngewthuh jingmut bad ka jingïatreilang ban pynthikna ïa ka jingïaryngkat hapdeng ki shynrang bad kynthei.
Ka la batai shuh shuh ba ka jingïaid paidbah mynta ka sngi ka dei ka dak jong ka jingïatreilang, kaba pynshlur ïa ki paidbah ban ithuh ïa ka jingdonkam jong ka jingïaryngkat dor. Ka la pynpaw ba ki shynrang ki long kiba kongsan mar katjuh ha kane ka kam, namar ka thong ba kongsan jong ka jingïakhih ka long ban kyntiew ïa ka jingïatylli hapdeng ki shynrang bad ki kynthei, ban pynthikna ba baroh arngut kin ïasam ïa ka jingkitkhlieh bad ïashim bynta mar katjuh ha ka jingshim rai ha ïing bad ha ka imlang sahlang.
Ka la pynpaw ruh ïa ka jingdonkam jong ka jingshngaiñ, ka jingïaid lynti bad ka jingïoh ïa ki lad ki lynti na ka bynta baroh ki nongshong shnong jong ka shnong, da kaba ban jur ba ka imlang sahlang kaba kynthup lang baroh khlem da kheiñ ïa u shynrang ne kynthei kan synñiang sha ka jingroi bad jingkiew jong ka shnong.
Kiwei de kiba ai jingkren ha kane ka prokram ki kynthup ïa u ma R. Shadap, District Mission Manager ka Mission Management Unit, Jowai, uba la ai ïa ka jingkren pdiang bad ka kong Trinity Saioo, ka nongïoh khusnam Padmashree,
Ka la don ka jingpyni ia ka Skit ba la shim bynta da ka Laskein VO bad CLF. La pynlong ruh ia ka jingai khublei bad pynkup burom ia ki nongjop na ki VO SAC bad ia u Waheh Shnong kiba la noh synniang shibun sha kane ka prokram.
Kum shi bynta jong ka Gender Campaign, la pynlong ïa ka jingïaid kjat na Kiang Nangbah Stadium, Dongmihsngi ba la kaweh lama da u ma R.Shadap, District Mission manager jong ka District Mission Management Unit, Jowai bad leit pynkut ha District Library Auditorium, Mynthong, Jowai.
Ha kane ka sngi palat 1300 ngut ki la ïashim bynta ba kynthup ïa ki Self Help Group (SHGs), ki Village Organization (VO), ki Community Level Federation (CLF) na ki saw tylli ki C&RD Block ka Thadlaskeiñ, Namdong, Laskeiñ bad Amlarem, da kaba ïaid paidbah bad rah da ki plakad bad ki jingpyrta kiba kyntiew ïa ka jingïaryngkat kynthei bad shynrang.
