Ka Raij Jowai kumba ju long man la u snem ha ka 8 tarik u Lber hapoh ka jingpeit jingpyniaid ka Dorbar Niam ka la shim ban pyndep ia ka lehniam Thohlangdoh ha ryngkat ka jingiashimbyntalang ki shakri niam ka Raij naduh u Doloi, Pator, Langdoh, ki Sangot, ki Wasan, ki Phra Kur bad ki khun ka Raij.
Kane ka jinglehniam ka long shibynta ban ainguh aidem ia u Lei Langdoh na ka bynta ki jingkyrkhu ba la ioh bad ruh ka long shibynta ka jingpynkyntang ki khun ka Raij ia ka Mei mariang kaba la theh sei ki jingkyrkhu ha baroh ki liang.
Ia ka jinglehniam ne knia ainguh hakhmat ka duwan u Moo Langdoh la pyndep da u Sangot Paswet ha ryngkat ka jingsynranlang u Sangot Pakyntein bad u Sangot Pasubon kiba dei ki lai Sangot jong ka pateng khun pateng ksiew ka Kur Sookpoh Khatar Wyrnai.
Nalor ka jinglehniam ha kane ka sngi, ha ka jingpyniaid u Pator kum u shongknor la pynlong ruh ia ka Dorbar Niam ha kaba la iashimbynta da ki kñi, ki riew rangbah bad ki khun samla ka Seinraij bad ka mat ba la ia kren iatai kyrpang ha kane ka sngi ka long “ka bhah ka bynta ki Phra Kur-Phra Kmai ha ka Niam”.
Na ka liang u Dolloi Waheh Puramon Kynjing kum u khlieh ka niam khlieh ka Elaka haba iakren u la iathuh ba ka nongrim jong ka jingpyndep niam ha kane ka sngi ka long ba ki khun ka Raij ka shnong ki pyni ka jingburom bad kheinkor ia ka Mei mariang kaba la theh sei ki jingkyrkhu ia u khun bynriew ha baroh ki liang bad ha kane ka sngi kat kum ka adong niam ki khun ka Raij kim bit ban trei ban ktah ne ban leh kino kino ki kam da kaba pynjot bad pynsniewdur ia ka mei mariang bad ki sawdong sawkun jongka.
Shuh shuh na ka liang u Dolloi u ai ruh ka jingkitbok kitrwiang bad ki kyntien ai mynseim ia baroh ki khun ka Raij, ka Elaka ka ri bad ka jaitbynriew ba kumba ka Raij Jowai ka lah ban pyndep ia kane ka jinglehniam mynta ka sngi hapdeng ka jingshongkun shongblei, u khmih lynti ba ka jingpyndep ia kiwei ki kam niam hapoh ka Raij ka Elaka ha ka nongrim jong ka Shad Ñiam Behdieñkhlam kin long kiba iaidbeit iaidryntih bad iphuh iphieng.
