Jowai : Mynta ka sngi u District Magistrate ka West Jaiñtia Hills District u bah Garod L.S.N Dykes IAS ula pynbna ba la shah ban pynlong ia ki kynja jingialang paidbah hapoh ka District katkum ki kyndon aiñ bad la shah ruh ia ki kali jong ki riew shimet (Private) ban mih ne iaid ha surok 100 %.
La pyntip ba la shah ban pynlong ki jingialang ha ki Dorbar Shnong, ki jaka ai jinghikai la ki dei jong ki riew shimet ne sorkar hynrei dei pat ban ban ioh jingbit shwa na ka ophis u Deputy Commissioner bad na u Sub-Divisional Officer (Civil) Amlarem.
La shah ruh ia ki kali shimet ban iaid haduh 100% hapoh ka West Jaiñtia Hills District naduh ba la pynmih ia kane ka hukum tad haduh ban da pynmih da kumwei pat.
Na ka bynta ki prokram ai jinghikai ban seng kam kiba dei na ka sorkar ne ki riew shimet la shah ia ki ban pynlong ha ryngkat ka jingbud ryntih ïa ki kyndon SOP ba la pynmih da ka Ministry of Skill Development & Entrepreneurship bad ka jingioh jingbit na u DC.
Na ka bynta ka jingmane Blei la ka dei ha ki ïingmane, ne ki temple bad kiwei kiwei ki jaka mane blei la shah tangba kim dei ban palat ia ka 50% ka jingbun briew na ka jingngaim jong ka jaka mane, ha ka juh ka por ki paidbah ki dei ban pynïajngai iwei na iwei kumba 5 phut eiei.