Ki Tourist nabar bad napoh jylla ruh kin hap ban bud ia ki SOPs ka sorkar
Jowai: Ka Sorkar jylla kala pynmih ia ka hukum ba la shah ia ki nongjngohkai pyrthei (Tourist) kiba nabar jylla ban poi ne wan jngohkai shapoh ka jylla Meghalaya naduh ka 1 tarik u Nailar mynta ka snem, ha ryngkat ka jingbuh kyndon kaba ki hap ban bud pyrkhing bha.
Ki kyndon (Standard Operating Procedures- SOPs) kiba ka sorkar lyngba ka tnad ka koit ka khiah kala buh ba ki nongjngohkai pyrthei ki hap ban bud ki long:
1. ba yn shah tang ia kito ki Tourist kiba la dep ban ai tika pura
2. ki tourist kiba dep ban ai tang shisien ka injek tika, lane lada don kiba ialam ia ki khun kiba 11-18 snem ki hap ban pynshisha ia ka jinglong Negative jong ki lyngba ka RT-PCR/Tru/Nat/CBNAAT Report kaba kila dep ban test hapoh ka 72 kynta shwa ban poi ha ki jaka rung (entry point)
3. ka sorkar kam pdiang ia ka RAT test na ka bynta kito ki tourist kiba wan na shabar jylla
4. kito ki tourist kiba don jingsngewpher ne don jingshitom ha ka met wat la kila dep ban ai tika ruh kim dei ban wan shapoh ka jylla
5. ki dei ban reigister ha ka Meghalaya portal lane ka app (www.meghalayatourism.in) na ka bynta ban ioh ia ka e-invite.
Na ka bynta ki nongjngohkai kiba napoh ka jylla yn shah tang ia kito kiba la dep ban ai tika baroh ar sien ba kin sah ha ki Hotel, da kaba ki hap ban pyni ia ka certificate jong ki ha ki nongpyniaid Hotel.
Lada dei ba ki dang dep ai tang shi sien ka tika , lane lada don kiba ialam ia ki khun kiba 11-18 snem ki hap ban leh ia ka test RT-PCR/Tru/Nat/CBNAAT Report kaba long negative kaba kila dep ban test hapoh ka 72 kynta ha shwa ba ki poi ha ki Hotel ne kino kino ki jaka sah. Kino kino ki nongjngohkai pyrthei kiba kwah ban ioh jingshai ki lah ban ioh na ka Meghalaya Tourism Helpline Team naduh ka por 10:00 AM haduh 8:00PM ha ki sngi longtrei da kaba phone ha u number +91-7640003050.