Ka seng JYF East Jaintia Hills ha ka jingleit buh dorkhas ha u Border Area Development Officer (BADO), East Jaintia Hills District ka la pynpaw ba ka dap da ka jingsngew lyngngoh ban tip ba ka post Junior Engineer ka ba juh don ba trei baroh shikatta ha kane ka tnad mynta kam don nongtrei shuh.
Ha ka jingiadei bad ka post Junior Engineer ka bym don nongtrei mynta la jan dap shisnem, ha dien ka jingia kren katto katne bad u Incharge Officer u la kular ban shim khia ia kane ka kam halor ka jingdonkam ban don ia u ne ka Junior Engineer khnang ban lah ban shna ia ka Estimate budget ia kito ki shnong ba hap hapoh ka Border Area ban ioh pyntrei ia kano kano ka project ba wan na ka sorkar.
Hadien kane ka seng ka la leit ruh ban ia kynduh ia u Deputy Commissioner, East Jaiñtia ha ka office trei kam jong u ban pynsngew halor ka juh ka nongrim ba ki paidbah ka East Jaiñtia kito ki shnong ba don ha border Area ki mat jingeh ha ka jingiadei bad ki scheme sorkar bapher bapher ba ki dei hok ban ioh na kane ka office treikam jong u Border Area Development officer, tang na ka daw bym don u Junior Engineer.
Ha ka jingdei bad kane u DC u ruh u la kular ban tuklar halor kane ka kam khnang ba ki paidbah ba don ha ki Border Area kin ioh ia ka roi ka par ha ki shnong ki thaw jong ki.
Ka seng ka la kyntu jur ia ka sorkar hapoh ka jingialam u Conrad K Sangma kum u Chief Minister ban shimkhia halor kane ka kam bad kum juh ruh ia ki nongmihkhmat jong kine ki Constituency kata Sutnga Seipung Constituency bad Khliehriat Constituency kata i kong Mery Santa Shylla bad kum juh u ma Kyrmen Shylla ban shimkhia ha kane ka kam khnang ba ki paidbah ba don kito ki thain kin ioh ia ka roi ka par.
La pynkut ka kyrwoh khubor ba la phah da u J. Pala, President ka Jaintia Youth Federation, East Jaintia Hills.