Ia ki drok (Drugs) kiba la ioh ban kurup baroh shi katta da ka tnad Pulit na kylleng ki bynta jong ka Jylla kiba hap hapoh ka jingkhmih jong ka Eastern Range ka tnad Pulit, mynta ka sngi la wanrah ia ki ha ka Karkhana pynmih dewbilat jong ka Star Cement kaba don ha shnong Lumshnong, East Jaiñtia Hills na ka bynta ban ioh thang ia ki hapoh katei ka Karkhana.
Ia kane ka jingthang ia ki drok la leh hadien ba ka tnad Pulit ka la ioh ia ka jingai bor na ka ïing bishar. Ki drok kiba la ioh ban thang mynta ka sngi ki dei na ki 51 tylli ki case, kiba kynthup 10 tylli na East Khasi Hills, 2 tylli na Ri-Bhoi District, 14 tylli na West Khasi Hills bad 25 tylli na West Jaintia Hills. Haba kheinlang ia baroh ka dor jong kine ki drok kala kot sha ka 4 (saw) klur tyngka iathuh u DGP u Dr.L.R Bishnoi, IPS ha ka jingkren sha ki lad pathai khubor.
Na ka liang une u khlieh duh ka tnad Pulit ula iathuh ba ki dang don shuh shuh ki drok ki ba dang sah mynta, ha kaba ka tnad Pulit kan sa pynduh ne thang pat ia ki kham hadien. Bad mynta ka tnad Pulit ka dang ap biang ia ka rai ne ka jingaibor na ka ïing bishar ban ioh pynduh ia kine kiba dang sah.
