Ban wanrah ïa ka synshar khadar kaba khuid ba suba lyngba ki kam ïalap Election, ha kane ka 6 tarik Kyllalyngkot 2023 la pynkha ïa kawei ka kynhun treimon sngewbha ïa kaba la ai kyrteng ka ‘Volunteer For A Better Jaiñtia’ haka jingïalang ba la pynlong ha Yungwalieh ka Tpep Pale Dorbar Chnong Jowai.
Ka jingthmu ba kongsan jong kane ka kynhun ka long ban trei borbah ïa ki kam ba bha hapoh ka Ri-Lum Jaiñtia bad ha ka jylla hi baroh kawei, ha ryngkat ka jingïatreilang naduh ki nongïalam shnong (Waheh Shnong), ki nongïalam ñiam, ki riew shemphang bad ki longkmie ban ai ka jingïada bakyrpang ïa ki khun samla na ki kam sniew kiba ha rukom.
Kumba long mynta ïakane ka kynhun la ïalam khmat da ka kong Dayoophi Iakai kum ka Convener bad uma Phrangsngi Sutnga kum u Co. Convener, haba ïakren bad ki lad pathai khubor mynta ka sngi 9 tarik kitei ki nongïalam kila pynsngew haduh mynta kila don kumba 80 tam ki dkhot kiba la wan ban pynïasoh ïalade hynrei katba dang mih ki sngi ka jingwan pynrung dkhot ka dang ïaibteng manla ka sngi.
Na ka liang ka kong Dayoophi Iakai kala ong ka jingthmu ban seng ïa kane ka kynhun ka long halor ka nongrim ban wanrah ïa ka bha ka miat ha ka imlang ka sahlang kaba kynthup naduh ki kam ïalap Election ha ka rukom kaba dei, ka rukom pyntrei kam ïa ki skim sorkar, ki kam sniew pyrshah ïa ki khun samla bad kiwei de. Naduh u snem 2018 kum ki nongïalam ba hakhmat jong kane ka seng kila sdang ïa kane kaseng treimon sngewbha ha ryngkat ka jingïakren sngewthuh jingmut bad ki nongïalam shnong, ki nongïalam ñiam bad ki riew shemphang ka Ri-Lum Jaiñtia halor ka nongrim jong ka bad kiba bun hi ki ai ka jingkyrshan ba pura.
Kala pynsngew ruh shaphang ki skim kum ka Welfare Board jong ka sorkar kmie kiba dei ban poi sha ki nongïoh myntoi hynrei kiba bun hi kim shem la ïoh ïa la ka jong ka hok, kala ong ba ka jingmih pyrthei jong kane ka seng kan ïakhun katba lah ban pynsngewthuh sha ki paidbah nongïoh myntoi. Ha kaba ïadei bad ka kam ïalap Election MLA na ka bynta kane ka snem 2023, na ka liang ka “Volunteer For A Better Jaiñtia” kan sa phah ïa ka jingthoh sha baroh ki nongïalam shnong (Waheh Shnong) ba kin long kiba husiar halor ka rukom pynlong ïa ki (Campaign) jingïalangpaidbah hapoh ki shnong jong ki da ki kynhun saiñ hima sima ba kim dei satia ban ïalam bakla ïa ki khun samla lane sam ïa ki jingdih pynbuaid bad ka pisa.
Halor ka rukom ïalap Election kane ka seng kan ai jingmut dei ba yn shah tang u kyrtong (candidate) lem bad ki saw ngut ki nongbud ki ban wan rung shapoh kano kano ka dong ne ka shnong ba pynlong jingïalang, khang ba u kyrtong lem bad kitei ki nongbud sawngut kin ïoh ban pynsngew ïala ka nongrim jong ki ha ki nongshong shnong jong kato ka dong ne shnong ba pynlong jingïalang. Ka kong Iakai kala ong ha ki snem ba la dep la juh mih ki jinghuri hura, ka jingtieng jingsmeij bad ki jingpynklumar kiba laiphew jait na ka daw ba jur palat ka jingïadih pynbuaid bad ki ktien khlem akor kiba mih na ki nongkyrshan ba nabar jong u/ka kyrtong kiba la don da ki spah ngut ban rung sha kiwei pat ki dong ne ki shnong.
Ka seng ka khot lang ïa baroh ban wan shakhmat ban ïasnohkti lang bad kane ka seng “Volunteer For A Better Jaiñtia” bad khamtam eh ïa ki longkmie ba kin rung kyrteng hapoh kane ka seng ban ïaleh pyrshah ïa ki jingsniew jong ki khun samla ka Ri-Lum Jaiñtia bad ban wanrah ïa ki jingbha jingmiat, na ka liang ka seng ka don ka jingkyrmen skhem ban ai ka jingshakri kaba bha tam.