U Myntri Sorkar Jylla uba dei ruh u MLA ka Khliehriat u Ma Kyrmen Shylla ha ka 16 tarik Naitung 2025 ha ba kren bad ki nongthoh khubor halor ka jingjyllei u droks u la pyntip ha ba iadei bad u droks ka long ka mat ka ba kongsan bha ha ka jylla bad ha ka pyrthei hi baroh kawei.
U la ong bun ki khynnah samla ki shah pynngop ha une u jingdih buiad bad u droks u ialeh ban pynjot ia ka imlang ka sahlang bad kumjuh ia ka longïing longsem.
“Lada baroh ngi iatreilang kam don jingeh bad ngin lah ban pynduh jait ia une u droks” la ong u Ma Kyrmen shylla.
Ka sorkar jylla ka don ia ka shnat treikam bapher bapher kum ka tnad pulit ka tnad ka koit ka khiah ka ju iatreilang ban rat dyngkhong bad kumjuh ban pynduh jait ia u droks ha ka jylla.
U ai khublei ruh ia ki dorbar shnong bapher bapher kiba iarap ia ka sorkar ban iatreilang ban kyntu ia ki samla ban nym ngop ha u droks.
U la pyntip haba iadei bad ka jingnohsynniang ki bun ki nongialam ki pynlong da ki jingialehkai na ka bynta ki khynnah samla ba kin lait na u droks bad kin iashim bynta ha ki jingialehkai bapher bapher.
Ym tang ka jingialehkai hynrei ngi dei ban noh synniang shimet shimet ban pynphriang halor ka jingsniew u droks ym dei ban buhrieh, lada buhrieh ka dang pynshlur shuh shuh ia kiba ngop ha u droks la ong shuh shuh u Ma Kyrmen Shylla.
