Ka Synjuk ki Waheh Shnong Jowai mynta ka sngi hadien ka jingïakynduh bad u Deputy Commissioner kila pyntip ba ki lah ban khot syndon da ka jingpakhang ïew naduh ka 7 tarik mynta u bnai lada dang neh sah ki ñiut kiba don ha kylleng ki bynta jong ka Iawmusiang bad ha sor Jowai.
Ka Synjuk hapoh ka jinglamkhmat u President ma Alan Niangti, kila leit ban ïa kynduh ïa u Deputy Commissioner ka West Jaiñtia Hills District u bah Garod L.S.N. Dykes, IAS ha ophis treikam jong u ha ryngkat ka jingdonlang jong u Chairman ka Jowai Municipal Board (JMB), u ma Fidel War, ka kong B. Blah, MCS, Executive Officer, Jowai Municipal Board lem bad ki dkhot ka Synjuk.
Hadien ka jingïakynduh na ka liang u President ka Synjuk ma Alan Niangti ula ong ba na ka liang ki bor pynïaid District lem bad ka tnad Jowai Municipal Board haduh mynta ka sngi kim shem la lah satia ban pynkhuid lut ïa ki ñiut kiba dang neh shah ha kylleng ki bynta jong ka Jowai kum ha Iewmusiang, Iawthymme bad sha ki dong kiba doh hapoh ka Jowai. Hynrei na ka liang kila pan por sa lashai ka sngi 6 tarik u Kyllalyngkot ban pynkhuid noh ïa ki ñiut kiba dang sah kut.
Ka Synjuk kala kren shai ba lada kitei ki ñiut ki dang neh sah, kim banse ban khot beit da ka jingkhang ïew naduh ka 7 tarik mynta u bnai, ha ka juh ka por ka Synjuk ka kyrmen skhem ba ïa kane ka kam yn sa lah ban pynbeit noh mardor naduh lashai ka sngi khnang ban lait na kino kino ki jingeh ïa ki paidbah.
La ïoh jingtip ruh mynta ka sngi haduh ka por 7 waje duna ki don kali kit ñiut ka kiba kynthup ïa kawei ka trok Dumper, 5 tylli ki trok ka Jowai Municipal Board bad kawei ka kali Pick-up kiba la thmu ban leit theh ñuih ha ‘Mooshutsdai’ khapud ka Thadmusem bad Sohphoh West Jaiñtia Hills District ha ryngkat ki pulit, hynrei na ka liang ka Elaka Nartiang Coordinate Committee (ENCC) kaba kynthup lang ïa ki seng Bhalang bad ki paidbah nongshong shnong jong katei ka thaiñ kila ïeng pyrshah bad phah pynsangeh ïa kitei ki kali kit ñiut.
