Kumba la ju paw man ka sngi ba ka Nongbah Shillong mynta ka khapngiah bha bad ka jingdheng kali ka la nang kiew katba nang tyllun ki sngi. Ha kaba iadei bad kane ka bynta, u Myntri Rangbah ka jylla Conrad K. Sangma u la pyntikna ba ka jingringdur bad ka jingthmu na ka bynta ban shna ia ka surok ar mala ne ia kaba la tip kum ka ‘Elevated Road’ kaba naduh Rilbong haduh Barik ka la dep mynta hynrei mynta ka rai kaba khatduh hap ban ap na ka Tnad Defence Ministry jong ka sorkar India.
U Myntri Rangbah u la ong ba katba ka jingthmu (plan) la dep ban ioh, mynta hap ruh ban ap ia ka Detail Project Report (DPR) ia kaba yn sa phah hapoh 4 bnai.
U Sangma u la iathuh ba la ioh ban pynlong ia ka jingialang bad ka la tnad Defence Ministry bad ka tnad ka la iathuh ba na ka bynta ka jingmyntoi u Paidbah, ka Defence Ministry ka kloi ban iatreilang.
“Ngi la dep ban iakren tang na ka bynta kane kawei ka mat, bad ka Defence Ministry ka la kren da kaba shai ba ka kmen shibun ban iatreilang. Ngi khmih lynti ia ka jubab kaba biang bad ka jingiatreilang bad baroh ki tnad ki ban don bynta ha kane ka Projek” ong u Myntri Rangbah.