Ka Dorbar Shnong Rwiang hynne na sngi ka 3 tarik Naitung ka la wan kynduh ia ka Meghalaya State Pollution Control Board (MPSCB) ha ryngkat ki nongmihkhmat jong ka Company bad ka shnong ka la pyntip sha ka Meghalaya Pollution Control Board (MPCB) ba kan ailad ia ka M/S Shree Shakambarri Ferro Alloys Pvt Ltd ban plie biang ia katei ka karkhana ha Rwiang tang lada ka pyntikna ban bud ryntih ia ki kyndon jong ka MOU bad ka shnong.
Lah ban kdew ba ki paidbah katei ka shnong ha ryngkat ka Dorbar Shnong kham mynshwa ki la khang khyrdep ia katei ka karkhana kaba don ha ka shnong Rwiang hadien ba kam shym la bud ia ki kyndon bad ia ki lad ki lynti halor ka rukom bret ia u fly ash kaba la ktah ia ka shnong bad pynjaboh ia ka mei mariang.
Haba ïakren bad ki nongthoh khubor hadien ba la ïakynduh ïa ki heh jong ka pollution board, u Sirdar ka shnong Rwiang u bah Wiljoy Iawphniaw u la ïathuh ba 70 percent ki paidbah nongshong shnong ki im ja na katei ka company.
U bah Iawphniaw u la kam ba ka jingjaboh ka lyer kaba dang mih na katei ka kompeni ka la buh ia ka jingeh kaba khraw ia ka koit ka khiah jong ki paidbah nongshong shnong bad ka la pynjaboh ruh ia ki sawdong sawkun jong ka mei mariang.
U la maham ruh ba kim banse ban khang khyrdep biang ïa katei ka karkhana lada kam lah ban ïada ne bud ia ki kyndon MoU (Memorandum of Understanding bad ka shnong.
Na ka liang u Member Secretary jong ka Meghalaya Pollution Control Board u la pyntip ba ka Pollution Control Board ka la khang ia katei ka Company la palat 3 bnai namar ka jingpynjulor ia ka mariang.
U la bynrap hadien ka jingjurip bad ka jingioh ia ka kaiphod tohkit ka company ka la kohnguh ban bud ia ki kyndon jong ka Meghalaya Pollution Control Board bad katkum ka nongrim kam lah ban bteng ban khang sah ia katei ka company bad kumta ka la weng noh ia ka jingpynbna khang ia katei ka company ha Rwiang.
