U Rajnath Singh ba dei u Myntri iada ri ka India ula ai ka jingmaham kaba tyngeh bha ia ka ri China da kaba ong ba lada don kano kano ka jingshah ktah jong ka India khlem pep kan pynphai kylla khlem da kheiñ iano iano ruh.
Ia kane ka jingmaham u Singh ula kren mynta ka sngi ha ka jingpdiang burom ia u da ka Indian Consulate ha nongbah San Francisco, jong ka ri United State of America (USA). U la ong ba na ka liang jong ki shipai ka ri India ryngkat bad ka sorkar kila shim khia bha ban iada ia u pud u sam khamtam ki bynta ba don mar khappud bad ka ri China, kum ha ki thaiñ jong ka Ladakh bad ka Galwan Valley. Ula ong ba lada ka India ka shah ktah ne shah pynjot ka India khlem pep kan pynphai kylla.
Haba kren sha ki nongshong shnong Indian-America ha San Francisco u Singh ula ong ha ka India hapoh ka jingialam jong u Myntri Rangbah u Narendra Modi mynta ka la long kawei na ki ri kaba khlaiñ bor bad kala nang jam shaphrang ban kynjoh sha ka kyrdan kiba lai na ka jingkiew ha ka ioh ka kot ha ka pyrthei. U Singh ula ai ruh ia ka khubor sha ka US ba ka jingiateh paralok jong ka ri India bad kino kino ki ri ha pyrthei kam dei kaba da shah pynbor ha kino kino ki ri. Ka India ka kwah ban don ka jingiadei kaba bha bad kino kino ki ri ha ka pyrthei bad kam kwah ban wanrah nalade ia kino kino ki jingsniew pyrshah ia kiwei pat ki ri ka pyrthei. [India Today]