Kawei na ki seng saiñ hima sima hapoh ka jylla ka Khun Hynniewtrep National Awakening Movement (KHNAM) mynta ka sngi ka la pynskhem ia ki nongkitkam jong ka State Youth Wing ha ka jingialang ba la pynlong ha Khasi National Dorbar Hall, Mawkhar, Shillong.
Ia ki nongkitkam jong ka KHNAM State Youth Wing la wan ban pynskhem da u President Rangbah jong ka KHNAM Sengkmie u Bah Pyndap bor Saibon ha ka jingiadon ryngkat u Working President u Bah Thomas Passah bad kiwei de ki nongialam ba ha khmat jong ka Seng.
Haba ai jngkren ha ka jngialang u Bah Saibon u la ong ba ha ka jinglong nongialam kin bun ki jingshah pynthame, jngshah pynbiej, na ka diang bad na ka mon hynrei kum ki samla ba la rai skhem ban bah ia ka lyngkor kum ki nongialam ka jaitbynriew ki dei ban ïeng skhem ha ka nongrim. Ban long nongialam ha ka kane ka juk mynta hap mad shibun ki jngshahbeiñ shah kynthoh khamtam ha ka juk Social Media u la ong shuh shuh.
U Working President ka KHNAM bah Thomas Passah haba ai jngkren u la pynpaw ba ka KHNAM kam dei eh ka party ban jop tang ha ka elekshon ban ioh pisa hynrei ka don la ka nongrim ban trei kam.
Ka KHNAM kan iakhun tyngeh ha kane ka MDC elekshon ka ban sa wan bad lada ka ioh ia ka bor synshar ki paidbah kin sa iohi ia ka District Council kaba thymmai la ong shuh shuh utei u rangbah ka KHNAM.
Ki nongkitkam ba thymmai jong ka KHNAM State Youth Wing, ki kynthup ia u President Bah Eric Swer, Working President cum treasurer Bah Pynshai Mawrie, Working President Bah Joseph Pyngrope, GS Bah Wanbhabok Marweiñ, Asst GS Bah Melambha Lyngdoh, Education Secretary Bah Sylverson Umdor, Asst Education Secretary Moris Efferson Sohtun, Sports Secretary Bah Kitbok Dkhar, Asst Sports Secretary Bah Lamshuwa Majaw, Agricultural Secretary Richard Nongbsap bad Bah Banpli Mawroh bad la thung Adviser ïa u Bah Thomas Passah.