Ka Education Cell jong ka Khasi Students’ Union (KSU) Central Body, kaba la ialam da u Chairman Employment Monitoring Cell Bah Ruben Najiar ryngkat bad ki dkhot ka seng ki la leit ban ia kynduh ia u Chairman ka Meghalaya Public Service Commission (MPSC) u Bah D. Langstang, ban iakren ha kaba ïadei bad ka jingpynïaid ïa ki eksamin bad ki rukom thung kam bad ki jingeh ba ki samla wad kam ki iakynduh.
Haba kren ha ki lad pathai khubor hadien ba la wai ka jingialang, u Bah Ruben Najiar u la ong ba ka KSU, la katto katne snem, ka la pyrshah ia kaei kaba ka shim ba ka long ka jingtreikam bym shai bad bym hok jong ka MPSC. U la pynkynmaw ba ka seng ka la pynlong bun tylli ki jingïakhih paidbah ha ki por ba la dep, hadien kane ka Sorkar Jylla ka la thaw ïa ka komiti ban eksamin ïa kine ki mat.
U la pynpaw ba ka komiti ka la aiti ïa ka kaiphod jong ka kumba san bnai mynshwa, hynrei haduh kine ki sngi bun na ki jingai jingmut jong ka kim shym la lah ban pyntreikam.
Kane ka jingpynslem, u la ong, ka la pynbor ia ka KSU sa shisien ban leit sha ka MPSC ban pan jingshai na u Chairman jong ka balei ba haduh mynta ym pat lah ban shim ia ki sienjam kiba skhem ban weng ia ki jingeh.
U Bah Najiar u la kynnoh ba ka jingkylla khah khah ha ki polisi treikam jong ka MPSC bad ki rukom thoh eksamin ka la wanrah ïa ka jingkulmar jingmut bad ka jingsyier ïa ki nongthrang, khamtam ïa ki kandidet kiba la kham rangbah kiba la pynkhreh ïa ki eksamin ïakhun la bun bun snem. U la bynrap ruh ba ka KSU ka pyrshah jur ïa ka rukom leh eksamin descriptive, da kaba kynnoh ba kam don ka jingkhuid jingsuba.
Ha kane ka jingiakynduh, u Chairman ka MPSC u la pyntip sha ka kynhun ba ka jingiakren bad ka jingbishar bniah ka dang iaid shakhmat bad ba yn sa shim ia ki sienjam kiba donkam. Hynrei ka KSU ka la pynskhem ba tang ki jingpynthikna kim biang shuh, bad kaba donkam kyrkieh ka long ban pyntreikam mardor ïa ki jingai jingmut jong ka komiti.
U Bah Ruben Najiar u la maham ba ka KSU ka la pyrshang ban wanrah ia ka jingkylla lyngba ka jingiakren bad ki bor sorkar mynta la shisnem tam lyngba ki jingialang kiba bun tylli. U la maham ba lada ka sorkar bad ka MPSC kim shim ïa ki lad ki lynti kiba tyngeh bad kiba kloi ban pynbeit, ka seng kan hap ban pyrkhat ïa ki rukom iakhih kiba kham jur ban ïada ïa ka hok bad ka lawei jong ki samla bym pat iohkam ha Meghalaya.
