Ka Joint Action Committee Muster Roll Worker Union ha ka 17 tarik Lber 2026 ka la pynlong da ka jingiaid Rally kaba la sdang na State Central Library ter ter sha Malki, Lachumiere, bad pynkut biang ha State Central Library.
Ha kane ka sngi da ki spah ngut ki nongtrei Muster Roll na kylleng ki District ki la iashimbynta shitrkhem ha ka jingiaid rally kum ka dak ban pynsngew halor ka jingsngap mynthi ka Sorkar ban pyntreikam ia ki mat jingdawa kiba ki nongtrei Muster Roll ki la dawa na ka Sorkar lah slem bha.
Ha shwa jong ka jingiaid rally ka la don shwa da ka jingialang ha Soso Tham bad ki nongtrei Muster Roll ki la ioh ban pynsngew ia shibun ki mat haba iadei bad ka jingbym ioh tulop, ka jingpynshong thait jubor bad kumjuh haba iadei bad ka RCW.
Na ka liang u Adviser ka JACMRWU u Ma Khroo L Pariat u la pynpaw ba ki nongtrei muster ki pynlong ia kane ka jingiaid rally dei ka jingsngap mynthi jong ka Sorkar bad kut tang ha ki jingkular ban khot iakren hynrei ym poi shano shano ruh.
Shuh shuh u la pynpaw ba ki nongtrei muster roll ki la rai ban pynlong da ka jingiakhih da kaba shong kyllaiñ myngor ha ka 9 tarik ïaiong 2026 lada ka Sorkar kam khot iakren ia ki nongtrei ka Joint Action Committee Muster Roll Worker Union.
Khatduh u la ong ba ka Joint Action Committee Muster Roll Worker Union ka kyntu ia ka Sorkar lyngba u Myntri Rangbah ka Jylla u Conrad K Sangma ba un khot iakren noh ia ki nongtrei muster Roll.
