Ka Boice of the People’s Party (VPP) lyngba u Dr. Ricky Andrew Syngkon MP ka jylla uba dei ruh u General Secretary ka VPP ka la phah da ka kyrwoh sha ka Sorkar (lyngba u Chief Secretary ka Jylla) ban pynshai halor ka shithi ba la iohpdiang ha ka 2 tarik Iaiong 2025 ban iatai halor ka Lynti Rel ha ka Jylla.
Katkum katei ka kyrwoh ba la phah sha u Chief Secretary hynne ka sngi (14 Ïaiong 2025), la ong ba ka seng VPP kam pdiang da lei lei ban shong iakren bad ka Sorkar Jylla ryngkat ka All party Committee (APC) ba la thaw da ka Sorkar na ka bynta ban wanrah ia ka Lynti Rel. Shuh shuh la ong ba lada ka Sorkar ka lah nyngkong ban teh lakam ia ka jingwanrung khyrtep ki briew na bar jylla (influx) ka seng kan sa pyrkhat halor ka jingdonkam ka lynti Rel.
“Ngi ngeit ba tad haduh ba la lah thaw ia ki lad ban ïakhun lane buh da ki jaka phira bad ki jaka khmih (check Point) ha khap-pud na ka bynta ban pyntikna ia ka jingioh rung pathar ki briew na kylleng ki jaka, ngin sa lah ban pynithuh ia ki lynti Rel. Lada khlem pat lah ban iakren ia kine ki mat nyngkong, ka jingthmu ka APC kan kut tang ha ka jingpynsyrwa kai ia ka por bad ka bor” pynpaw ka VPP lyngba ka kyrwoh.
Ka VPP ka pynshai ba kiwei na ki lad jingiada ka dei tang lada lah ban pynurlong ia ka Inner Line Permit (ILP). Ka kyrwoh ba la soi da u Dr. Syngkon ka pyntikna ruh ba ka VPP kan ym shim bynta ha katei ka committee khlem kitei ki mat jingdawa ki ban treikam shwa.