Ka khubor halor ka jingshah pyniap u Raja Raghuvanshi ha kine ki taïew ka khluit shuh shuh hadien ba ka Soonam Raghuwanshi ka la leit ban pyndem (surrender) sha ki bor pulit ka Madhya Pradesh bad kam ba ka la lait im na ka jingiap namar ka jingkheiñduh (sacrifice) u Raja ban iarap ia ka na ka bynta ba kan ioh ia ka khubor ban pyntip sha ki ba haïing.
Ka Shrasti Raghuwanshi kaba dei ka para trai jong u Raja ka la pynpaw lyngba ki rynsan Media ba ka Soonam ka la don ei ei sha lyndet naduh ki sngi iateh ktien namar katkum ka jingiathuh u Raja ha ka Kmie, ba ka Soonam kam mon ia u. Ka Shrasti ka la ong ba lada kam mon bad ieid balei ban jied da kane ka lynti kaba ktah lut ia ka ïing ka sem “Lada phim ieid balei hap ban da pyniap ia u hymmen jong nga? Balei phim shu phet, balei phim hap ban shim ia ka jingim jong ki hymmen para jongno re jongno?”.
Kane ka khubor ka la nang pynklumar shuh shuh ha kaba u kpa ka Kmie bad ki hymmen para ka Soonam ki la kam ba ka Soonam ka long kaba shida bad da lei lei kam ym leh ia kane ka kam bymman.
Ki ba haïing jong u Raja da ka jingbitar ki la ong ba lada la ioh ia ka jingtikna halor ka jingiap u khun jong ki, ka aiñ ka dei ban phasi ia ki 3 ngut kynthup ia ka lok u Raja.
Ki pulit ka Madya Pradesh ki dang bteng mynta ia ka jingtohkit na ka bynta ban pynshisha shuh halor kane ka jingiap u Raja bad katkum ka kaiphod ba la ai da u DCP Rajesh Dondotia, ka Court ka la bthah ba ia ki 3 ngut, kata u Raj Kushwah, u Vishal Chauhan bad Akash Rajput ban phah biang sha Meghalaya na ka bynta ba ka Meghalaya Police kan tih jylliew halor kane ka kam bad buh ha along 7 sngi.