Ha ka jingialang jong ki Dkhot ka Meghalaya School Welfare Development Association Central Body (MSWDACB) hynne ka sngi ka 29 tarik Lber 2025 ha National Dorbar Hall, Mawkhar Shillong hapoh ka jingialam jong u President Bah H.M. Marbaniang, la iakren halor ka jingshem jingeh jong ki Nonghikai ha kaba iadei bad ka jingsiew, ka jingithuh noh ia ki skul bym dei sorkar (Non-Government) bad ka jingleh shilliang jong ka Sorkar.
Ha kane ka jingialang, u Bah Marbaniang u la iathuh ba katkum ka sorjamin jong ka CRC, la buh thong ban don noh tang kawei ka UDISE Code. Ka MSWDACB ka pynpaw ia ka jingangnud ba ka Sorkar kan ithuh noh ia ki skul ba la seng da ki Missionary ne ki skul Mission bad ki skul ba la seng da ki Seng Bhalang kum ki Non-Government Institution.
U la ban jur ruh ha kaba ka Sorkar kan ai ia ka jingiarap ne ka jingsiew kaba iaryngkat ha ki skul baroh kiba dei ki skul Non-Government. U Bah Marbaniang u la iathuh ba kane ka jingleh shiliang jong ka Sorkar ban siew ia ki nonghikai ka ktah nyngkong ia ki khynnah skul, namar ka duh noh ka nongrim jong ki na ka jinghap ban bujli Nonghikai man ka por na ka daw ba ki Nonghikai kiba ioh ia ka jingsiew kiba kham heh ki hap ban mih noh sha kiwei pat ka skul na ka bynta ban bit ban biang ha Ïing.
“Lada lah ban leh ia kane, na ka liang ki Nonghikai ki lah ban tehlakam ia ka jingmih surok jong ki Nonghikai ban iakhih pyrshah na ka bynta ban pynkiew tulop. Dei namar ba ka don kane ka jingleh shilliang ba ngim lah ban khanglad ia ki kynhun ban mih surok, hynrei lada ka don ka jingryntih (uniform) ha baroh, nga tharai ngi ki Skul ngi lah ban teh lakam ia ki Nonghikai ba kim dei ba kin mih sha surok ban iakhih pyrshah” ong u President ka MSWDACB.
U la ong ba lada iakren ia ka jingpynbha ia ka pule puthi lane ban kyntiew ia kane ka bynta bad ka jingpyniaryngkat naduh nongkyndong, ka Sorkar ka dei ban thung noh uwei u Nonghikai shi klass bad ym ban bteng biang ia kane ka juh ka rukom mynta, kata da kaba buh tang 2 ngut ki Nonghikai ha kawei ka skul. U la kdew ruh ba ka sorkar kan weng noh ia ka jingbuh kyrdan ha ki skul bapher bapher, kata ba ki skul SSA, ADHOC, ne kiwei kiwei ki skul kin iapher ha ka rukom siew.