U nongialam jong ka Khooid Ya Ka Wah Myntdu u ma L. Khroo Pariat ula iathuh ba hadien ba la ioh jingtip ba ki bor District kin sa leit ban bret ne theh ia ki ñiut ha ka jaka jong ka JHADC ia kaba la tip kum ka Pangit kaba don ha Khliehtyrshi, na ka liang ki dkhot jong ka seng kila leit ban jurip ia katei ka jaka.
Ha ka jingleit jurip jong ki, u ma Khroo ula ong ba katei ka jaka ka dei kaba long khlaw bad sharing bad lada theh iaki ñiut ha katei ka jaka khlem da tih da ki thliew mar sien poi u slap kine ki jakhlia kin sa tuid lut sha ki hali pynthor bad shaduh ka wah Myngkrem kaba don ha trai une u lum. Na ka wah Myngkrem pat kine ki jakhlia kin sa poi shaduh ka wan Myntdu. Kumta ula buh ka jingkyntu ia ki bor ba dei peit ban leh ei ei na ka bynta ka bha ka miat jong ki um ki wah.
U ma Khroo ula pynrem ruh ia ka jingleit bret pathar jong ka JMB ia ki jakhlia kat shaba lap. Ha kine ki khyndiat sngi la lap ba ka JMB kala bret ia kine ki ñiut sha ki wah liar kiba don shadien jong ka Thomas Jones Synod College, Jowai.