Hadien ba la bna ba ym slem shuh ki Paidbah nongshong shnong jong ka Sohmynting, Demthring, Jowai bad Mihmyntdu bad kiwei ki shnong ba marjan kin sa ioh shen ia ka Umkor na ka Wah umngot, ka kynhun jong ki Nongthoh Khubor ki la hiar sha Umngot ha ka jaka ba shna ia kane ka Project ring Umkor na ka Wah Umngot ha kane ka 5 tarik mynta u bnai bad ha ka jingshem jinglap jong ki Nongthoh khubor ia ka jinglong jingman jong ka Ban (Dam) ha kaba ka kynroh jong ka Ban (Dam) la jan mar shiteng ka la twa bad ha ka jaka kaba la twa ka kynroh la shu pyndap da ka khyndew bad kaba bun ka um ka tuid (leak) napoh kane ka khyndew kaba la pyndap bad tang shu poi u ‘lap lyiur ka umsaw kan sa rongnoh ia kane ka khyndew bad ka um kan sa tuid na kane ka jaka ba la twa ka Ban (Dam) bad ka Ban (Dam) tan um kan sa rngat, lada ym lah ban shna maramot kloi ia kane ka bynta kaba la twa.
Ha kane ka jingleit jurib ki Nongthoh Khubor ia kane ka Project la lap ruh ba la jan ha man ka jaka ba bteng ia u Tyndong Umkor u tyndong um uba poi sha ka Sor Jowai, ka um ka jaw (leak) bad la dei ban phah welding kloi ba ka jingjaw jong ka um kan ym heh. Ha ka juh ka por kane ka kynhun jurib ka la lap ruh ba ia u Tyndong Um uba dei na ka bynta ka shnong Sohmynting bad Demthring dangsah teng ka jingbteng pyniasoh ia une u tyndong umkor uba dei ban poi sha ka shnong Sohmynting bad Demthring. Ka kynhun jurib ym lah ban len ka la iohi ba ka jingtrei ia kane ka project kam shym la sangeh bad ka jingtrei pynbha ka dangiaid shait shait, hynrei pat lada ym lah ban kynroh ia kane ka Ban (Dam) kaba la twa bad pynbha ia ka Kynroh jong ka, kaba dangsah la thikna ba ka jingioh ki Nongshong shnong jong ka Jowai bad kiwei de ki shnong kiba marjan ia ka Umkor na ka Wah Umngot kan dangshim por wat lada la ong ba ha ka jingpyrshang ban pump ia ka Um la lah ban pynpoi ia ka um sha Urkhla Jowai.
