Mynta ka sngi ka Co-Ordination Committee on International Borders (CCIB), ka la pynlong ia ka jingialang paidbah ha Enowel Hall Amlarem, na ka bynta ban ia kren ia ki jingeh ba ki nongshong shnong ki thaiñ khappud jong ka War Jaiñtia ki ia kynduh halor ka jingker sainar shiah bad ka ri Bangladesh kaba lah ban ktah shi katdei eh ia ki nongrep ba don ki jaka rep jaka riang ha ki thaiñ War khappud ka Ri Bangladesh.
Ha kane ka sngi ia ka jingialang la pyniaid da u ma Suklang Myrchiang, Chairman CCIB bad la iadonlang ruh u ma Kmen Myrchiang General Secretary CCIB, ma Katdoh Rymbui, ki dkhot ka JSU, KSU bad ki paidbah ka thaiñ war kiba don ki jaka rep jaka riang ha ki jaka khappud kiba lah ban shah ktah ha kane Border Fencing jong la sorkar.
U ma Kmen Myrchiang, General Secretary u la ong ba ka CCIB ka pynpaw ka jingpynrem jur ia ka District Council kaba la ai ia ka NOC sha ka sorkar ia ki jaka ki puta khlem kano kano ka jingpyntip shwa sha ki trai jaka ne trai khyndew ne pynlong shwa ia ka Public Hearing, da kaba ki la ong ba kane ka long kum ka jingiuh roit ia ka hok longbriew kiba don ka hok ia ka jinglong trai ia ka khyndew ka shyiap hapoh kane ka bri u hynniewtrep kaba doh hapoh ka Sith Schedule. U la ong ruh ba ia ka District Coincil la buh ia ka na ka bynta ban iada ia ka khyndew ka shyiap ki jaka puta, hynrei ka long pynban da khongpong. U la ong ruh ba na ka liang ka CCIB kan leit kyrpad ruh da ka stay order na ka High Court halor kane.
U la ong ba ka CCIB kam pyrshah ia ka jingker sainar shiah jong ka sorkar, hynrei ka dei ban pynbeit shwa ia u pud u sam kat kum ki dulir ne ki kot ki sla kiba ki trai jaka ki don bad kumjuh ruh ka District Council ka don, khnang ba kane ka jingker sainar kan ym pynduh nong ia ki nongrep ne ki trai jaka kiba don ha ki jaka khappud.
Ka CCIB kala pynremjur ruh ia jingwan sopsop ki briew jong ka sorkar ban pynbor ia ki trai jaka ban shim ia ki jaka naka bynta kane ka Border Fencing, da kaba phah ia kynduh ia ki ha ki sngi bapher bapher ban shu pynbieit ia ki da kaba ong ba ka sorkar kan sa ai ka copensation bad kin ioh kiwei de ki jingmyntoi.
Na ka liang ki kynhun bapher bapher kiba kamai kajih na ki kam jngoh kai pyrthei khamtam ha Dawki kila pynpaw ia ka jingeh kaba khraw, ba lada ker ia ki jingker katkum ka jingthmu jong ka sorkar kan wan rah ia ka jingduh nong kaba khraw ia ki spah spah ngut ki briew ha kine ki thain khappud, namar kumba long mynta da ki hajar ngut ki briew kila im jakpoh ha ki kam bapher bapher ha ka jingiadei bad ki jaka jngoh kai pyrthei.
