Ka Jalapang SC kala long syndon ka lahduh mynta u snem haka lympung ïalehkai phutbol bala tip kum ka “8th Invitation Knock-out Football Tournament” ba la pynïaid da ka Wahiajer Sport Cultural Club, West Jaiñtia Hills District ha madan Wahiajer Multi Sports Complex.
Ha ka jingïakhun phainal mynta ka sngi 8 tarik u Kyllalyngkot, 2025 ka kynhun ïalehkai jong ka Jalapang SC kala lah ban pynliem da 6-2 kol ïaka Nongdawah SC, ïa kitei ki kol naka Jalapang la thep da u Oliver Pale haka minit ba 57, u Kitbok Pale haka minit ba 80+4, 87 (ET), 89 (ET), 94 (ET) bad u Kynsai Luhuid haka minit ba 96 (ET). Ïa ki ar kol na ka Nongdawah SC la thep da u Chanmitre Thma haka minit ba 40 bad u Shano Tariang haka minit ba 65.
Haba phai ha ka jingïakhun jong ka kylla step haduh ka kylla miet kila poi sha ka jingïakhaid da mar 2-2 kol, na ka liang ki bor pynïaid kila hap ban pynïakhun da ka Extra Time, na ka liang ka Jalapang kala ïoh ban pyntam haduh saw (4) kol.
Ïa ka nam Man of the match bad ka nam Player of the Tournament la ïoh da u Kitbok Pale na ka Jalapang SC, ïa ka nam Top scorer la ïoh da u Stephan Pale naka Jalapang SC uba la thep haduh 7 kol, ïa ka nam best Goalkeeper of the Tournament la ïoh da u Da e mitre Dan naka Jalapang SC.
Na ka liang ka kynhun kaba ïoh rah ïa ka nam lahduh kala ïoh khur ïa ka song pisa kaba 2,30,000/- hajar tyngka lem bad ka Trophy. Ka kynhun ba wan ba ar Runners-Up kala ïoh 1,20,000/- tyngka lem bad ka Trophy. Ïa ki khusnam sha ki nongjop la sam da u kongsan jong kane ka sngi uba dei ruh u SP ka West Jaiñtia ma C. Syrt, ha ka jingdonlang ki nongpynïaid jong ka Wahiajer Sport Cultural Club nalor kiwei de.
