Ka kynhun ïalehkai jong ka Jaraiñ FC kala long ka lahduh haka lympung ‘Open To All Knockout Football Tournament, 2022’ ba la pynïaid da ka West Jaiñtia District Sports Association (WJDSA) kaba la long mynta ka sngi saitjaiñ ha madan Kiang Nangbah Stadium, Dongmihsngi Jowai.
Ïa kane ka lympung ba pynïaid da ka (WJDSA) shi bynta na ka jingrakhe jubilee ksiar ka Association kaba la jam sha u mawmer ba 50 snem jong ka jingshakri ban pynkiew ïa ka kam ïalehkai Sports hapoh ka District.
Ka Jaraiñ FC ka la long ka lahduh hadien ba ka la pynliem da 4-3 kol ïa ka PHE lyngba ka jingïashut Tie-Breaker. Haba phai ha ka por jong ka jingïakhun kine ki ar kynhun kim shem la ïoh ban thep kol satia naduh ba sdang jong ka kylla step tad haduh ka kylla miet. Katba ïa ka Man of the Match la ïoh da u Sewi Rymbai na ka Jarain SC.
Na ka bynta ka kynhun ba jop ha kane ka lympung ka la ïoh rong ïa ka song pisa kaba 2 lak tyngka lem bad ka trophy, katba ka kynhun ba wan ba ar ka la ïoh 1 lak tyngka lem bad ka trophy. Ïa ki khusnam sha ki nongjop la sam da u President ka Meghalaya State Olympics Association bah John F. Kharshiing lem bad ki dkhot ka West Jaiñtia District Sports Association, Shillong.