ïong rong haduh T.50 hajar tyngka
Ka Chilliangraij Sports & Youth Affairs Committee ha kane ka sngi Saitjaiñ jong ka 1 tarik u Naitung kala pynhap pyrda ïaka lympung ïalehkai phutbol ba mar san ngut (tiger Five) ïa kaba la tip kum ka 12th Tiger Five Football Tournament-2023.
Na ka liang ki ar kynhun kiba la poi sha ka jingïakhun phainal ki long ka Rishot FC pyrshah ïa ka Kynjai Para-I FC bad ha kane ka sngi la wan sakhi da u kongsan u ma Brightstar Chyrmang, MDC-JHADC, ha ka jingdonlang u samla T. Suchen, General Secretary JSU Central Body, ki riew rangbah ka shnong bad ki paidbah.
Hashwa jong ka jingïakhun phainal la don ka jingïalang ba lyngkot ha kaba u ma Cheini Niangti ula ïathuh shaphang ka jingïaid lynti jong kane ka lympung kaba la kynjoh mynta sha ki 12 tylli ki snem.
Na ka liang u Brightstar Chyrmang ha ka jingkren ula ai ka jingïaroh ïa ka Chilliangraij Sports & Youth Affairs Committee kaba la shim khia ha ka ban kyntiew ïa ka sap ka phong jong ki khun samla ka thaiñ, ha ka juh ka por u ai mynsiem ïa kane ka Committee ba kan nang ïai bteng ïa kane ka lympung manla ka snem.
Haba phai sha ka jingïalehkai hapdeng kine ki ar kynhun haduh kaba kut ka jingïakhun ka Kynjai Para I FC kala ïoh ban thep haduh lai tylli ki kol, ïa kine ki kol la thep da u Deiborha haka minit ba 29, u Premrose haka minit ba 39 bad u Kynsai haka minit ba 59, katba na ka liang ka Rishot FC kala ïoh ban thep tang ar kol kata haka minit ba 40 da u Kevin bad haka minit ba 69 da u Tremiki.
Ka Kynjai Para-I FC kaba long syndon ka lahduh mynta ka snem 2023 bad kala ïoh rong ïa ka song pisa kaba 50 hjar tyngka ryngkat ka Trophy, katba ka kynhun ba wan ba ar ka Rishot FC kala ïoh rong ïa ka song pisa ba 30 hajar tyngka lem bad ka Trophy.
Ïa ka nam Top Scorer la ïoh da u Oliver Pale ka Oxford F, Best Goal Keeper la ïoh da u Forlic Dkhar ka Kynjai Para-I FC bad ïa ka nam Best Player la ïoh da u Premrose ka Kynjai Para-I FC.
