Ka kynhun ïalehkai jong ka Lion Sports & Youth Affairs kala long syndon ka lahduh ha ka lympung ïalehkai phutbol bala tip kum ka “7th U Debo Shullai Memorial Trophy” jong ka kyrdan 2nd Division Football Tournament 2024 bala pynïaid daka West Jaiñtia District Sports Association (WJDSA) Jowai, ha ka jingïakhun phainal mynta ka sngi saitjaiñ 19 tarik u Risaw, 2024 ha madan Kiang Nangbah Stadium Dongmihsngi, Jowai.
Haba phai sha ka jingïakhun Final ka Lion Sports and Youth Affairs kala pynliem da 2-1 kol ïa ka Nangbah Dukhu, ïa kitei ki ar kol na ka Scorer Lion Sports and Youth Affairs la thep da u Wailad Dame Niangty haka minit ba 30 bad u Prosperwell Dhar haka minit ba 40.
Na ka liang ka kynhuh jong ka Nangbah Dukhu kala ïakhuh katba lah ban pynphai kylla ïa kitei ki kol, hynrei dei ha ka minit ba 63 jong ka kylla miet kala ïoh ban pynphai tang kawei ka kol lyngba u rangïalehkai jong ka u Lamahwa Dong.
Ïa ki khusnam sha ki nongjop la sam da u kongsan bah Sanbor Shullai MLA kaShillong South uba dei ruh u Chairman of Meghalay Tourism Development Corporation ka sorkar jylla, ha ka jingdonlang ki dkhot ka West Jaiñtia District Sports Association (WJDSA), nalor kiwei de kiba la shah khot sngewbha.
Ïa ka nam Top Scorer la ïoh da u Prosperwell Dhar naka Lion Sports and Youth Affairs. Best Goalkeeper la ïoh da u Wandari o Chyrmang naka Nangbah Dakhu. Man Of the Match la ïoh da u Lamchwa Dong naka Nangbah Dukhu, katba ka nam Player of the Tournament la ïoh da u Thuara Nampui naka Nangbah Dukhu.