Ka kynhun ïalehkai jong ka Madan Kynsaw Mawkyndeng SC kala long syndon ka lahduh haka jingïalehkai phianal jong ka lympung 3rd U Adelbert Laloo Memorial Trophy haka kyrdan 3rd Division Football Tournament 2023, ba la pynïaid daka West Jaiñtia District Sports Association (WJDSA) ha madan Kiang Nangbah Stadium, Dongmihsngi Jowai.
Ïa kane ka phainal la pynlong shi bynta na ka jingrakhe ïa ka National Sports Day, ha kaba la don haduh 46 tylli ki kynhun ba ïashim bynta, ha kane ka jingïakhun phainal mynta ka sngi ba ar ka Madankynsaw Mowkyndeng SC kala lah ban pynliem da 3-0 kol ïa ka Mukhla Umlangshor SC.
Haba phai ka jingïakhun phainal kaba itynnad bha namar ha ka por jong ka kylla step kala long kaba ïakhiad bha khlem da don kiba ïoh thep kol 0-0.
Hynrei haka jingïakhun jong ka kylla miet ka Madankynsaw Mowkyndeng SC kala ïoh bn thep ïa ka kol kaba nyngkong lyngba u Ïoomaiki Lamare haka minit ba 47, hadien tang katto minit ula ïoh biang ban thep ïa la kol kaba ar ha ka minit ba 52, katba ïa ka kol kaba lai la thep da u Cherishson Tyngkan ha ka minit ba 80+3.
Na ka liang ka kynhun Mukhla Umlangshor kala pyrshang ban pynphai kylla ïa kitei ki lai kol hynrei kam shem la ïoh lad satia namat ka jingtbit ki rangïalehkai ba shadien jong ka Madankynsaw Mowkyndeng.
Ïa ka nam Man of the Match la ïoh rah da u Ïoomaiki Lamare na madan kynsaw, Best Goal Keeper la ïoh da u Wansame Saioo na ka Madankynsaw, u rang ïalehkai ba ïoh bun kol eh u dei u Precious Tang na ka Maddan Thadmuthlong uba la thep haduh 14 kol, katba ïa ka nam Player of the Tournament la ïoh da u Dangri Phawa na ka Madankynsaw.
Ha kane ka sngi la ai khusnam ruh sha ki 2 ngut National Referee ryngkat ka pisa kaba mar 10 hajar tyngka kum ka jingïarap.
Ïa ki khusnam sha ki nongjop la sam da u kongsan jong kane ka sngi u ma E.M.H Passah uba dei u Working President ka WJDSA, ha ka jingdonlang u Ma S. K. Lato, Hony General Secretary ma Lammat-oo Laloo, Vice President ma Patrik Lamare, ki dkhot ka WJDSA, kiba ha ïing u (L) U Adelbert Laloo nalor kiwei de kiba shah khot sngewbha ha ryngkat ki paidbah nongkyrshan na baroh arliang.
Na ka liang u kongsan ma E.M.H Passah ula ai ka jingkitbok kitrwiang ïa ka WJDSA ba kan dang lah ban ïaid shaphrang ha ka ban pynlong ïa ki lympung ïalehkai bapher bapher. Ha ka juh ka por ula ai mynsiem ïa baroh kitei ki ar kynhun naduh kaba jop bad ka kynhun ba wan ba ar ba kin dang don ïa ka mynsiem ïalehkai ha ki sngi ban wan.
