Ka District Level Chief Minister Football Tournament 2023 jong Under-12 Boys and Girls ba la pynlong da ka DSO, East Jaintia Hills District Khliehriat kaba sdang mynnin ka sngi bad kala poi sha kaba kut mynta ka sngi ha madan ialehkai ha Deiñchynrum.
Ia kane ka lympung la dep ban pynialeh shwa ha ki 3 tylli ki Block bad ia ka Saipung Block la phiah ha ki artylli ki Zone ka Tluh bad Jalaphet.
Ha ka jingiakop Final kaba la long mynta ka sngi, ka Wapung Block ka la jop ha baroh ar ki jingiakhun ha ka liang ki Shynrang bad Kynthei.
U Kongsan ha kane ka sngi u dei u bah Banraplang Jyrwa, Addl. SP, East Jaiñtia Hills bad u ma Willbert Nongtdu ula long u symbud Kongsan.
Ha ka jingialehkai jong ki Kynthei ka Wapung Block kala lah ban pynliem ia ka Tluh Zone (Saipung Block) da 1-0 kol. Ia kane ka kol jop la ioh ban thep da ka Larisha Lyngdoh ha ka minit kaba 37.
Ha ka jingialehkai jong ki Shynrang pat ka Wapung Block kala long biang ka nongjop ha kaba ka la lah ban pynliem ia ka Lumshnong Block da 3-1 kol. Ia ki kol na ka liang jong ka Wapung la ioh ban thep da u Lazio Dkhar ha ka minit kaba 10 bad 46, bad u Khrobormi Sutnga. Na ka liang ka Lumshnong Block pat la ioh ban thep kol da u Ennocent Mylliem ha ka minit kaba 17.
