Ka Manipur ka la ioh ban lamkhmat ha ka iakob siat khnam Indian Round ha ka lympung 2nd North East Olympic Games 2022, katba ka Assam pat ka la ioh ban lamkhmat ha ka Compound division ha ki lympung iakhun kaba long ha SAI Training Centre ha ka sngi Ba-ar (15/11/22).
Ka Manipur ka la ioh 6 tylli ki takma ksiar, ar tylli ki rupa bad ar tylli ki takma rnong ha ka Indian Round. Ka Assam pat ha kawei ka liang ka la ioh ban khur kawei ka ksiar, saw tylli ki takma rupa bad ar tylli ki rnong. Ka Nagaland pat ka ioh ban khur tang kawei ka takma rupa, bud sa ka Meghalaya ar tylli ki takma rnong bad ka Arunachal Pradesh kawei ka takma rnong.
Ha ka thup Compound pat, ka Assam ka la ioh ban khur san tylli ki takma ksiar bad kawei ka takma rnong, ka Manipur pat ka ioh ar tylli ki takma ksiar, san tylli ki rupa bad ar tylli ki rnong. Ka Arunachal Pradesh pat ka la ioh ban khur ar tylli ki rupa, ka Nagaland ka ioh lai tylli ki takma rnong bad ka Sikkim ruh kawei ka rnong.
Lada kheinlang ia ka jingioh takma na kitei ki ar tylli ki thup ialehkai, ka Manipur ka la ioh 19 tylli ki takma kynthup lang ia ki 8 tylli ki takma ksiar, Assam 13 tylli ki takma ksiar kynthup 6 tylli ki takma ksiar, Arunachal Pradesh lai tylli ki takma kynthup ar ki rupa, Nagaland ka ioh saw tylli ki takma kynthup kawei ka rupa, Meghalaya ar tylli ki rnong bad ka Sikkim pat kawei ka rnong.
Ia ka thup iakhun Recurve pat yn pynkut noh ha ka sngi Balang, kaba dei ka sngi khatduh jong ka NEOG 2022.