Hynnin ka sngi (01/08/24) ha ka por kumba 11:00 baje mynstep ki Pulit kila ioh ia ka jingpyntip na ki riew paidbah ba la lap ia kawei ka met iap kaba per ha sla um ha ka wah Satharlong.
Na ka liang ki Pulit jong ka East Jaintia Hills mar kila leit sha katei ka jaka bad kila pynlong ka jingtohkit bad kila sei ruh ia katei ka met iap na poh wah kaba la pyut. Ki Pulit ha ryngkat bad ki nongsakhi kila pynlong ia ka post mortem bad hadien kata la leit buh ia katei ka met iap ha ka jaka buh met iap jong ka Khliehriat Civil Hospital.
Na ka liang jong SP ka East Jaintia Hills District ula buh ka jingkyntu ia kino kino kiba don jingiadei bad utei u rangbah ba la khlad ba kin wan shimti noh ia ka met iap jong u bad ki lah ruh ban phone ha u I/O Mobile Number: 8119969604.
Katkum ka jingiathuh jong ki Pulit la ong ba une u rangbah ba la khlad u dei u bym lah ba ithuh kyrteng, u don ha ka rta kaba 40-45 snem ei ei, u don ka jingjrong kaba 5.4 ft, ka dur khmat kaba pyllun, ka snieh doh kaba kham shai, u phong ka T-Shirt rong iong bad ka patlun rong iong.