Ka khubor Pulit ba la phah la iathuh ba ha ka 29/12/2024 ha ka por kumba 4:05 PM ei ei ki la ioh ia ka jingpyntip lyngba ka phone ba ka don kawei ka met iap jong u rangbah briew ia u ba ym lah ithuh ne tip.
Ia katei ka met iap la lap na ki bynta ba shadien jong ka dukan kaba don mar shiliang bad ka Petrol Pump kaba hajan jong ka Sweet Shilli Gust House, kaba ha ka shnong Mynkre, East Jaiñtia Hills District.
Ha ka jingiadei bad kane na ka liang jong ki Pulit ka East Jaiñtia kila pynlong ia ka jingtohkit, ha kaba la lap ba une u rangbah u dei u bar jylla bad u don ha ka rta kaba 50-55 snem ei ei. La pyndep ia ka post mortem hapoh Khliehriat Civil Hospital bad ia ka met la buh ha ka jaka buh metiap jong katei ka Hospital.
Na ka liang ki bor Pulit ki kyntu ia kiba don jingiadei bad utei u rangbah ba kin wan shimti ia ka met jong u na katei ka Hospital bad lada don kino kino kiba don jingtip halor une u rangbah kin ai ka jingpyntip sha u I/O ha kane ka number: 7085809941, na ka bynta ban ioh leh ia kaba donkam.