Ka khubor Pulit kaba la phah la iathuh ba ha ka 29 tarik mynta u bnai ha ka por kumba 5:30 janmiet, kila ioh ban tam ia ka met iap jong uwei u rangbah briew na ka wei ka sem masi kaba don ha ka shnong Lakasein, Pohphang, East Jaintia Hills District.
Na ka liang ki Pulit jong ka Saipung Police Station, kila iathuh ba u ne u rangbah ba la khlad la tip kyrteng hadien kum u Justin hynrei ym shym la tip pat ia ka jait jong u. Une u rangbah u dei uba trei ha katei ka jaka ri mari la kumba shibnai ei ei. Ki Pulit kim shym la ioh kino kino ki jingpynshisha shaphang une u rangbah u dei nangno namar ba u sah tang marwei ha katei ka jaka.
Ki Pulit kila iathuh ba ka daw jong ka jingkhlad jong une u rangbah ka lah ban dei na ka jinging ding, namar kumba 80% ka met jong u na ki bynta ba shadien kala ing ding. Une u ranngbah u dong ia ka jingjrong kaba 5’3″, u phong da ka T-shirt rong saw, ka jaket kaba Blue, ka patlun kaba jyrngam bad u deng ia ka baje rong iong.
Hadien ba ki Pulit kila pyndep ia ka Post Mortem ia ka met jong utei u rangbah la buh ha ka jaka buh metiap ha Civil Hospital Khliehriat.
