Ka All Hynñiewtrep People United Front (AHPUF) kawei na ki seng treimon sngewbha hapoh ka Ri-lum Jaiñtia kala lap ïa kawei Petrol Pump ka bym pat shem la kwah ban pynpaw kyrteng da ka seng halor ka jingleh thok jong ka ïa ki paidbah kiba leit thep umphniang ïa ki kali.
Ka seng haka jingkren sha ki lad pathai khubor mynta ka sngi na ka liang u Secretary ka seng u bah Chandame Sungoh ula ong hynnin ka sngi ki nongïalam ka seng kila lap dalade ïa kane ka jingleh thok leh shukor jong katei ka Petrol Pump ha ka por ba leit thep umphniang san (5) liter na katei ka Petrol Pump, hynrei kitei ki nongïalam ka seng kila lap pynban ba ka umphniang ka don tang 3 litar kaba duna haduh 2 litar.
Ula pynsngew “na ka dor jong ka Petrol kaba long 97 tyngka tam shi litar, ka jingïoh lute bad ïoh nong jong katei ka Petrol Pump ka jur bha na ki paidbah”.
Kane ka jingshah thok jong ki paidbah ba lui lui kala long kumba ïuhroit ïa ka hok jong ki kaba kila dep ban siew ïa ka bai umphniang Petrol katkum ka dor ba la buh, ‘katno ka long kaba shaktah jur khamtam ïa kito kiba thep umphniang da ki phew litar bad kane ka long kaba sngewsih eh’ la ong u ma Chandame.
Halor kane ka seng ka buh ka jingkyntu ïa baroh ki trai Petrol Pump kumjuh ïa ki Manager bad ki nongtrei kiba don ha kylleng ka jylla ba kim bit shuh ban leh kum kine ki kam thok kam shukor ïa ki paidbah hynrei ki dei ban pynbiang tik pathik ïa ka umphniang Petrol sha ki nongthied.
Na ka bynta ka jingbit jingbiang jong ki paidbah khamtam ïa kito kiba kamai kali Taxi bad Tourist ba kin ym shah ktah shuh, ka seng ka kyntu dei ban pynbiang ïa ka rukom sam umphniang kaba biang ha baroh ki Petrol Pump hapoh ka jylla.
Ka seng ka buh ka jingmaham kaba tyngeh ba nangne shakhmat lada ki lap sa shisien kum kine ki rukom lehthok, na ka liang ka seng kan ym ai lad satia da kaba ïaid shakhmat katkum ki kyndon jong ka aiñ.
Shuh shuh ka seng kan sa phah da ka jingthoh sha ka bor jong ka Metrology Department ba kan jurip bniah ïa kane ka rukom thew bad woh umphniang ha manla ki Petrol Pump hapoh ka jylla, khnang ba kan ym ktah ïa kiba bun ba lang.