Ka EJNC-Khliehmyntriang Unit kala pynlong ia ka jingleit jurip ia kiba bun ki post bording elektrik hapoh ka jingialam u President Lektor S Dkhar bad ka la lap ba don shibun tylli ki post bording kiba ym long shuh ban pyndonkam bad kiba lah ruh ban wanrah jingmynsaw ia ki nongshong shnong hapoh ka thaiñ ha kano kano ka por bym poi pyrkhat.
Ka EJNC ka la kyntu ia ka ophis jong ka tnad MePDCL ba kin leit jurip hi da la ki jong ki khmat khnang ba kin iohi shai ba don shibun ki post bording ki ba la kdiah bad kiba la jan khyllon ruh hapoh ka shnong Jalyiah bad Khliehmyntriang na ka daw jong ka jingbam sarang ki nar. U samla Lektor u la ong ruh ba na ka liang jong ka seng kan iai buddien ia kane khnang ban ai ka jingiada ia ki nongshong shnong na kino kino ki jingjia ba sngewsih.
Ha kajuh ka por ka seng ka dawa na katei ka ophis ba kan ker ia u transformer ba don hapoh ka shnong Khliehmyntriang khnang ba ki paid nongshong shnong kin ioh ia ka jingiada, namar u ne u transformer u don hapdeng ka surok shnong ka buh jingma ruh ia ki khyllung khynnah kiba iaid lynti na jan une u transformer. Pynkut ka kyrwoh na u Vice President samla Saibun Dkhar.
