Ka Seng Federation of Khasi Jaintia & Garo People (FKJGP) mynta ka sngi ka 8 tarik Naitung2024, ka la leit ban khynra ia ki ba bun ki dukan bar Jylla ha ki thaiñ Polo, ha kaba ki la shu kamai sahuh khlem ki kot ki sla ba biang.
Ha kane ka jingleit khynra ka Seng la synran lang da ki Pulit, bad ki Magistrate. Ka Seng ka la lap ia bun tylli ki dukan, ki bym biang ki kot ki sla bad ka Seng ka la lap ruh ba kitei ki bar Jylla ki la pynlong jaka sah jaka thiah hapoh ki Dukan.
Ka Seng ka la lap ia ki Dukan bar Jylla, ba die ia kiba bun bah ki mar ki mata, ba kynthup ki dukan die tiar ïing, dukan Bam, dukan Kyiad, bad kiwei kiwei de ki dukan kiba ki shu shong beaiñ, khlem kot khlem sla.
Kumta ka Seng ka lah phah khang shisyndon ia kitei ki dukan bar Jylla, bad ong ruh ba kin pynbiang shwa ia ki kot ki sla, ba kin sa lah ban plie biang ia ki dukan jong ki.
La sakhi ruh katba ka Seng, ki bor Pulit bad ki ophisar ki dang iaid ban khynra ia ki dukan bar Jylla, ki la don katto katne ki dukan kiba la kloi ban khang noh da ki tala namar ba ki sngewthuh ba kim don ia ki kot ki sla ki ba biang, bad la lap ruh ba ki dukan bam ki long kiba jaboh bad i saitmet ban peit.
Ha ka jingiakren bad ki lad pathai khubor na ka liang u Bah Kharkupar Nongsiej, uba bat kum u chief Organising Secretary ka Seng Federation of Khasi Jaintia & Garo People (FKJGP), u la ong ba ka seng man la ka por kam ju shong thait ban khynra ia ki dukan ki bar jylla ba wan shong kamai ei khlem da pynbiang ia ki kot ki sla. U la ong ruh ba ka Seng kan sa nangiai buddien ban khynra ia ki dukan jong ki bar Jylla baroh, bad lada ki kwah ban kamai, ki hap ban pynbiang ia ki kot ki sla bad lada kim pat lah ban pynbiang ia ki kot ki sla kim dei ban wan plie ia kine ki Dukan jong ki.
