Ha ka jingiadei bad ka jingjot ka surok Jowai by-pass tang hapoh shi sngi ar sngi ba la dep ban maramot, na ka liang ki nongialam ka Hynniewtrep Achick National Movement (HANM) Jantia Zone, mynta ka sngi ki la pynlong ka jingjurip ia kane ka surok ha kaba la lap ia ka jingshisha ia ka jingjot ha ki ba bun ki bynta wat tang shi taiew ruh ym pat don ba la dep ban maramot, kane ka la pynlong ka jingsngewlyngngoh ia ki nongialam jong ka HANM.
Na ka liang u President ka HANM Jaiñtia Zone u bah Shaniah Suchen, u la ong ba kane ka jingpyntrei ne maramot ia une u surok ka long kaba shu trei tangdep rukom ne ki shu pyntrei da kaba pyndonkam da ki mar kiba long ki bymler (Low Quality), ne la shu trei tangdep tang ban ioh ia ka nong khlem da pyrkhat ia ki paidbah. U bah Suchen u la kyntu jur ia ka sorkar ban phah maramot biang ia kane ka by-Pass ha u contractor ba pyntrei ia kane ka surok bad dei ban ai ruh ka hukum ban trei bha bad lada un trei kumjuh hi dei ban pynshitom ia u.
Shuh shuh na ka liang u bah Suchen u la pynpaw ruh ka jingsngew nguh ia ka ïingbishar High Court kaba la phah ia sorkar ban maramot ia kane ka surok, hynrei kaba sngewsih ba ki nongpyntrei ne ki contractor pat ki shu trei tangdep tang ban myntoi ialade khlem pyrkhat ia ka jingbha jingmiat jong ka imlang sah lang. Namar lada ka surok Jowai By-Pass kan bha kan miat kan iarap shi bun ban pynduna ia ka jingsah kut kali ha nongbah Jowai. Sa kawei ruh kane ka by-pass ka dei kaba pyndonkam da ki jylla bapher bapher jong ka thaiñ shateilam mihngi. Na ka liang ka seng ka la ong ba lada ym pynbha ia kane ka surok kat kum ba dei na ka liang jong ka seng kan sa leit ujor biang sha ka ïing bishar High Court jong ka jylla.